សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ សមត្ថកិច្ចបានប្រាប់ឲ្យដឹងថា កាលពីម៉ោង ៩និង៣៥នាទី ព្រឹកថ្ងៃសៅរ៍ ៤កើត ខែបឋមាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៦ ខែមិថុនា ឆ្នាំ២០១៨ មានគ្រោះថ្នាក់ចរាចរណ៍លើផ្លូវជាតិលេខ ៤ ចន្លោះ KMលេខ 135-136 ភូមិបឹងត្រាច ឃុំចំការហ្លួង ស្រុកកំពង់សីលា ខេត្តព្រះសីហនុ បង្កឡើងដោយរថយន្ត ដឹកថ្មម៉ាក ហុីយ៉ាន់ដាយ HYUNDAI ក្បាលពណ៌ ត្រួយចេក ពាក់ស្លាកលេខ ភ្នំពេញ 3C-1565 មានទិសដៅពីភ្នំពេញទៅខេត្តព្រះសីហនុ លុះដល់ចំណុចកើតហេតុខាងលើរថយន្តនេះ ដាច់កង់ក្រោយផ្នែកខាងស្តាំ រមៀលកង់ដែលដាច់ទៅបុកនឹងមនុស្សនៅចិញ្ចើមផ្លូវគ្រោះក្រហម បណ្តាលឲ្យរបួសធ្ងន់ ។
ជនរងគ្រោះ ឈ្មោះ វ៉ាយ វ៉ាត ភេទប្រុស អាយុ ៣៣ឆ្នាំ មានទីលំនៅ ភូមិក្រាំងអាត់ ឃុំកំពង់សីលា ស្រុកកំពង់សីលា ខេត្តព្រះសីហនុ ត្រូវបានកម្លាំង អាវុធហត្ថ ស្នាក់ការសនិ្តសុខ ៤០២ ជួយលើកអ្នករបួសដាក់លើរថយន្ត របស់បងប្អូនជនរងគ្រោះយកទៅសង្គ្រោះនៅមន្ទីរពេទ្យភ្នំពេញភ្លាមដែរ ។
ក្រោយកើតហេតុអ្នកបើកបររថយន្តបានរត់គេចបាត់ ។ ចំពោះរថយន្តខាងលើនគរបាល យកទៅរក្សាទុកនៅអធិការនគរបាលស្រុកកំង់សីលា បន្តតាមនីតិវិធី ៕ ឆ្លាម សមុទ្រ
