សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ លោក ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់អគារសិក្សា និងសមិទ្ធផលនានាក្នុងវិទ្យាល័យហ៊ុនសែនទួលខ្ពស់ ស្ថិតនៅភូមិរកាទង ឃុំទួលខ្ពស់ ស្រុកទឹកផុស ខេត្តកំពង់ឆ្នាំង និងដាក់ឲ្យដំណើរការប្រព័ន្ធ Digital Connectivity for School ដែលជាកិច្ចសហប្រតិបត្តិការរវាងក្រសួង ប.ទ.ជាមួយសាជីវកម្មទូរគមនាគមន៍កូរ៉េ (KT) ផងដែរ។
ពិធីនេះធ្វើឡើងនៅព្រឹកថ្ងៃសុក្រ ០២រោច ខែបឋមាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៩ ខែមិថុនា ឆ្នាំ២០១៨នេះ ដោយការចូលរួមពីគណៈប្រតិភូក្រសួង ក្រុមការងារថ្នាក់ជាតិចុះមូលដ្ឋានស្រុកទឹកផុស មន្ត្រីរាជការ ប្រជាពឡរដ្ឋ លោកគ្រូ អ្នកគ្រូ សិស្សានិសស្សចំនួនជាង៤០០០នាក់។
តាមរបាយការណ៍លោក ឈួរ ចាន់ឌឿន អភិបាលខេត្តកំពង់ឆ្នាំងបានឲ្យដឹងថា សមិទ្ធផលទាំងអស់នៃវិទ្យាល័យហ៊ុនសែនទួលខ្ពស់ដែលដាក់សម្ពោធឲ្យប្រើប្រាស់នាពេលនេះមាន ៖ អគារសិក្សាដ៏ទំនើប១ខ្នង មានកម្ពស់៣ជាន់ ស្មើនឹង១៨បន្ទប់ អគារទីចាត់ការ អគារកាត់ដេរ និងបង្គន់អនាម័យចំនួន២បន្ទប់ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន ។
ក្នុងឱកាសនោះ លោក ត្រាំ អ៊ីវតឹក បាននាំនូវបណ្តាំសាកសួរសុខទុក្ខ និងក្តីនឹករលឹកស្រឡាញ់យ៉ាងជ្រាលជ្រៅពីសំណាក់សម្តេចតេជោ ហ៊ុន សែន នាយករដ្ឋមន្ត្រី ជូនចំពោះថ្នាក់ដឹកនាំ មន្ត្រីរាជការគ្រប់លំដាប់ថ្នាក់ ព្រមទាំងបងប្អូនប្រជាពលរដ្ឋទាំងអស់នៃស្រុកទឹកផុស។
លោករដ្ឋមន្ត្រីបានថលើកឡើងថា អគារសិក្សាថ្មីនេះនឹងរួមចំណែកជាមួយរាជរដ្ឋាភិបាលក្នុងការពង្រឹងវិស័យអប់រំ ការអភិវឌ្ឍធនធានមនុស្ស ក៏ដូចជួយដោះស្រាយដល់ការលំបាកដល់ប្រជាពលរដ្ឋក្នុងមូលដ្ឋានក្នុងការបញ្ជូនកូនចៅទៅសិក្សានៅកន្លែងផ្សេងទៀត។ លោកបន្តថា អគារសិក្សានេះក៏មានបំពាក់បន្ថែមនូវសម្ភារៈបរិក្ខារទំនើប ដែលជាជំនួយរបស់ក្រុមសារជីវកម្មទូរគមនាគមន៍កូរ៉េ (KT) សហការភ្ជាប់បណ្តាញអ៊ីនធឺណិត និងឌីជីថលសម្រាប់សាលាជាមួយសហគ្រារដ្ឋទូរគមនាគមន៍កម្ពុជា (TC) ដើម្បីផ្តល់ភាពងាយស្រួយដល់អលោកគ្រូ អ្នកគ្រូ និងសិស្សានុសិស្សផងដែរ។
លោក ត្រាំ អ៊ីវតឹក បានថ្លែងថា ក្រោមគោលនយោបាយឈ្នះ-ឈ្នះរបស់សម្តេចតេជោ ហ៊ុន សែន នាយករដ្ឋមន្ត្រីបាននាំមកនូវសុខសន្តិភាព ឯកភាពទឹកដី ឯកភាពជាតិ ស្ថិរភាពនយោបាយ សន្តិសុខសណ្តាប់ធ្នាប់សង្គម លទ្ធិប្រជាធិបតេយ្យ ព្រមទាំងរក្សាបានទាំងស្រុងនូវអធិបតេយ្យ និងបូរណភាពទឹកដី រួមទាំងនយោបាយបែងចែកផ្លែផ្កានៃកំណើនប្រកបដោយសមធម៌ និងតម្លាភាព មានយុទ្ធសាស្ត្រត្រឹមត្រូវប្រកបដោយគតិបណ្ឌិត និងមានទស្សនវិស័យលើមូលដ្ឋានសច្ចៈខ្ពស់។
ជាមួយគ្នានោះលោក ត្រាំ អ៊ីវតឹក រដ្ឋមន្ត្រីរដ្ឋមន្ត្រីក្រសួងប្រៃសណីយ៍ និងទូរគមនាគមន៍ ក៏បានអំពាវនាវឲ្យប្រជាពលរដ្ឋទៅចូលរួមបោះឆ្នោតទាំងអស់គ្នានាថ្ងៃទី២៩ ខែកក្កដា ឆ្នាំ២០១៨ខាងមុខ និងបោះឆ្នោតជូនគណបក្សប្រជាកម្ពុជាដែលមានលេខរៀងទី២០ នៅលើសន្លឹកឆ្នោត ដើម្បីរក្សាការពារសន្តិភាព និងការអភិវឌ្ឍប្រទេសជាតិឲ្យកាន់តែរីកចម្រើនបន្ថែមទៀត៕ សុខ ខេមរា
