សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ រយៈពេល២ថ្ងៃជាប់គ្នានេះ កម្មការិនីរោងចក្រដេរស្បែកជើង យីហោ ជូ ហួយវូតវ៉ែ នៅភូមិអំបិលធំ ឃុំខ្វិត ស្រុកព្រៃឈរ ខេត្តកំពង់ចាម ប្រមាណជា១០០នាក់ បានដួលសន្លប់ជាបន្តបន្ទាប់ ត្រូវបានអាជ្ញាធរមានសមត្ថកិច្ច បញ្ជូនទៅមន្ទីរពេទ្យដើម្បីធ្វើការជួយសង្គ្រោះជាបន្ទាន់ផងដែរ ។
ប្រភពបានឲ្យដឹងថា កម្មការិនីរោងចក្រដេរស្បែកជើង ជូ ហួយ ចំនួន៤៨នាក់ បានដួលសន្លប់ជាបន្តបន្ទាប់ កាលពីព្រឹកថ្ងៃ១៣ ខែកក្កដា ឆ្នាំ២០១៨នេះ ហើយត្រូវបានកម្លាំងអធិការដ្ឋាននគរបាលស្រុកព្រៃឈរ សហកាជួយសង្គ្រោះកម្មការនី ដែលបានដួលសន្លប់ទាំងនោះ ដោយបញ្ជូនទៅកាន់មន្ទីរពេទ្យបង្អែកស្រុកព្រៃឈរ ។
កាលពីថ្ងៃទី១២ ខែកក្កដា កម្មករ សាខារោងចក្រ ជូ ហួយ ចំនួន៤៦នាក់ បានដួលសន្លប់ជាបន្តបន្ទាប់ត្រូវបញ្ជូនទៅសម្រាកនៅមន្ទីរពេទ្យបង្អែកស្រុកព្រៃឈរ ។ មូលហេតុ នៃការដួលសន្លប់នេះ ក្រុមការងារជំនាញ បង្កើតជាគណៈកម្មាការស៊ើបអង្កេតមួយក្រុម ដើម្បីចុះទៅពិនិត្យទីតាំងរោងចក្រផ្ទាល់ ។
រហូតមកដល់ពេលនេះ គឺមានរយៈពេល២ថ្ងៃហើយ ដែលមានបងប្អូនកម្មការីនី ចំនួន៩៤នាក់ បានដួលសន្លប់ ហើយត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកព្រៃឈរ។
រោងចក្រ ជូ ហួយវូតវ៉ែ ជារោងចក្រដេរស្បែកជើងមួយកន្លែង មានទីតាំងស្ថិតនៅភូមិអំពិលធំ ឃុំខ្វិត ស្រុកព្រៃឈរ ខេត្តកំពង់ចាម។ បច្ចុប្បន្ន រោងចក្រនេះ មានកម្មករ និងកម្មការិនី ចំនួន ១.០១៧នាក់ កំពុងបម្រើការងារ ៕
