សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្លាំងនគរបាលប៉ុស្តិ៍រដ្ឋបាលគោកឃ្លាងបានឃាត់ខ្លួនជនសង្ស័យ៥នាក់ ពាក់ព័ន្ធករណីហិង្សាដោយចេតនា(ប្រើកាំបិតកំណាត់ដែកជ្រុងវាយកាប់ចាក់គ្នាទៅ វិញទៅមកបណ្តាលឲ្យរបួសទាំងសងខាង)នៅចំណុចមុខលេងតាបបុកប៊ីយ៉ែរផ្ទះ សង់ថ្មី ផ្លូវបេតុង ភូមិត្រពាំងស្វាយ សង្កាត់គោកឃ្លាង ខណ្ឌសែនសុខកាលពីថ្ងៃអាទិត្យ ៣កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៥ ខែកក្កដា ឆ្នាំ២០១៨។
លោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខបាន ឱ្យដឹងថា ភាគីទី១-មានគ្នា៣នាក់រួមមាន ទី១-ឈ្មោះ លីន រ៉ាហ្វីត ភេទប្រុស អាយុ ១៨ឆ្នាំ ជនជាតិខែ្មរ មុខរបរនៅផ្ទះ ស្នាក់ នៅផ្ទះជួល ផ្លូវបេតុង ភូមិច្រេស សង្កាត់ គោកឃ្លាង ខណ្ឌសែនសុខ របួសពកក្បាល ខាងស្តាំ, ដាច់ស្បែកដើមដៃខាងឆ្វេង, ទី ២-ឈ្មោះ ទុយ តុង ភេទប្រុស អាយុ១៩ ឆ្នាំ ជនជាតិខែ្មរ មុខរបរកម្មករចិញ្ចឹមមាន់ ស្នាក់នៅផ្ទះជួល ផ្លូវបេតុង ភូមិច្រេស សង្កាត់គោកឃ្លាង ខណ្ឌសែនសុខ និងទី ៣-ឈ្មោះ ស្រូន វិន ភេទប្រុស អាយុ២៥ឆ្នាំ ជនជាតិខែ្មរ មុខរបរកម្មករចិញ្ចឹមមាន់ ស្នាក់នៅផ្ទះជួល ផ្លូវបេតុង ភូមិច្រេស សង្កាត់គោកឃ្លាង ខណ្ឌសែនសុខ របួស ក្បាលដេរចំនួន១៥ថ្នេរ, របួសប្រអប់ដៃ ខាងស្តាំដេរចំនួន១៥ថ្នេរ, ប្រអប់ដៃខាង ឆ្វេងដេរចំនួន១៥ថ្នេរ, កំភួនដៃស្តាំដេរ ចំនួន៣ថ្នេរ, របួសស្មាខាងឆ្វេងដេរ៧ថ្នេរ។
ភាគីទី២៖មានគ្នាចំនួន២នាក់រួមមានទី១-ឈ្មោះ ឈឹម រស្មី ភេទប្រុស អាយុ២៥ ឆ្នាំ ជនជាតិខែ្មរ មុខរបរកម្មកររោងចក្រ ក្រដាស ស្នាក់នៅផ្ទះជួល ផ្លូវបេតុង ភូមិ ក្រុងថ្មី សង្កាត់គោកឃ្លាង ខណ្ឌសែនសុខ របួសក្បាលដេរចំនួន៣ថ្នេរ , របួសគុម្គត្រចៀកខាងឆ្វេងដេរចំនួន២ថ្នេរ និងលើ ត្រចៀតខាងឆ្វេង៧ថ្នេរ និងទី២-ឈ្មោះ ជឿន ពន្លឺ ភេទប្រុស អាយុ១៨ឆ្នាំ ជនជាតិ ខែ្មរ មុខរបរកម្មកររោងចក្រក្រដាស ស្នាក់ នៅផ្ទះជួល ផ្លូវបេតុង ភូមិក្រុងថ្មី សង្កាត់ គោកឃ្លាង ខណ្ឌសែនសុខ។ ចំណែក សម្ភារបន្សល់ទុកកំណាត់ឈើ៧ដើម ។
លោកអធិការបានបន្តថា មុនពេលកើត ហេតុភាគីទី១បានដើរលេងនៅចំណុច កើតហេតុខាងលើ បានជួបជាមួយភាគីទី២ រួចបានមើលមុខគ្នាទៅវិញទៅមក។ ពេល នោះភាគីទី១បាននិយាយទៅភាគីទី២ថា មើលមុខស្អីគេរួចភាគីទី១បានជិះម៉ូតូចេញដល់ផ្លូវបេតុងឃើញកំណាត់ដែកបំពង់ទីប ជ្រុងប្រវែងប្រហែលកន្លះម៉ែត្រចំនួន២ដើមរើសយកត្រឡប់មកកន្លែងកើតហេតុវិញ លើដៃបក់ហៅភាគីទី២។ ស្របពេលនោះដែរភាគីទី២មានកាន់ខ្សែក្រវាត់និងដងកឺ បុកប៊ីយ៉ែចូលវាយតប់កាប់ចាក់គ្នាទៅវិញមកបណ្តាឲ្យរបួសទាំងសងខាង។ បន្ទាប់មកសមត្ថកិច្ចយើងបានទទួលព័ត៌មានចុះដល់ចំណុចកើតហេតុឃាត់ខ្លួនជនសង្ស័យទាំង៥នាក់យកមកសាកសួរនៅអធិការដ្ឋាននគរបាលខណ្ឌសែនសុខតែម្តង ។
បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋានគរបាលខណ្ឌសែនសុខដើម្បី អនុវត្តតាមនីតិវិធី ៕ ហេង នរិន្ទ្រ
