សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ ហេតុការណ៍ផ្ទុះបំពង់ហ្គាសនៅក្នុងបន្ទប់ជាន់ក្រោមដីនៃផ្សារទំនើប ដឹហេរីថេចវ៉កនេះ បានកើតឡើងកាលពីវេលាម៉ោង២០និង១០នាទី ថ្ងៃចន្ទ ៤កើត ខែទុតិយាសាឍ ឆ្នាំច សំរិទ្ធិស័ក ព.ស. ២៥៦២ ត្រូវនឹងថ្ងៃទី១៦ ខែកក្កដា ឆ្នាំ២០១៨ តាមបណ្តោយផ្លូវជាតិលេខ៦ ស្ថិត នៅភូមិ មណ្ឌល១ សង្កាត់ស្វាយដង្គំ ក្រុងសៀមរាប ខេត្តសៀមរាប។
មានករណីអគ្គិភ័យមួយបានកើតឡើងនៅផ្សារទំនើប ដឹហេរីថេចវ៉ក ក្នុងក្រុងសៀមរាប ដែលបណ្តាលមកពីផ្ទុះបំពង់ហ្គាសនៅក្នុង បន្ទប់ជាន់ក្រោមដីនៃផ្សារទំនើប តែមិនបណ្តាលឲ្យមាននរណាម្នាក់រងរបួសឡើយ។ ករណីអគ្គិភ័យនេះបានកើតឡើងគឺបណ្តាលមកពី ក្រុមជាងតម្លើងប្រព័ន្ធហ្គាសសំរាប់ចែកចាយទៅតាមបន្ទប់ផ្ទះបាយ បានតម្លើងខុសលក្ខណៈបច្ចេកទេស។
សមត្ថកិច្ចដដែលបានបន្តថា អគ្គិភ័យនេះ ត្រូវបានរថយន្តពន្លត់អគ្គិភ័យនៃ អង្គភាពបង្ការនិងពន្លត់អគ្គិភ័យ នៃស្នងការដ្ឋាននគរបាលខេត្តសៀមរាប និងកងរាជអាវុធហត្ថខេត្តសៀមរាប ចេញអន្តរាគមន៍សរុបចំនួន៨រថយន្ត ទើបគ្រប់គ្រងបានទាំងស្រុងនៅ វេលាម៉ោង២០និង៤០នាទី ដោយមិនមាននណារម្នាក់គ្រោះថ្នាក់ក្នុងហេតុការណ៍នេះឡើយ៕ ប៊ុនរិទ្ធី
