សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យ២នាក់ ជាមុខសញ្ញាឆក់ទ្រព្យសម្បត្តិប្រជាពលរដ្ឋតាមផ្លូវសាធារណៈ បានជិះម៉ូតូមួយគ្រឿងឌុបគ្នាមកធ្វើសកម្មភាពឆក់កាបូបស្ពាយស្រ្តីជនជាតិចិនម្នាក់ ក្នុងចំណោមគ្នា៥នាក់ កំពុងតែដើរទេសចរណ៍តាមដងផ្លូវ បានសម្រេច ហើយគេចខ្លួនបាត់ដោយសុវត្ថិភាព ។
ករណីចោរឆក់កាបូបស្ពាយជនបរទេសខាងលើនេះ បានកើតឡើងកាលពីវេលាម៉ោង៥ល្ងាចថ្ងៃអង្គារ ៥កើត ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹង ថ្ងៃទី១៧ ខែកក្កដា ឆ្នាំ២០១៨ តាមបណ្តោយផ្លូវព្រះស៊ីសុវត្ថិ នៅចំណុចមុខសណ្ឋាគារហ៊ីម៉ារ៉ារី ស្ថិតនៅក្នុងសង្កាត់ចតុមុខ ខណ្ឌដូនពេញ ។
តាមប្រភពព័ត៍មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញជនជាតិចិនមួយក្រុមមានគ្នាទាំងអស់៥នាក់សុទ្ធតែស្រីៗកំពុងតែដើរចេញមកពីសណ្ឋាគារមួយកន្លែង តាមបណ្តោយផ្លូវព្រះស៊ីសុវត្ថិ ក្នុងទិសដៅពីជើងទៅត្បូង ខណៈពេលកំពុងតែដើរនិយាយគ្នាសុខៗ ស្រាប់តែមានជនសង្ស័យ២នាក់ ដែលជាមុខសញ្ញាឆក់បានជិះម៉ូតូមួយគ្រឿងម៉ាកហុងដាស្តុបពី ពណ៌ក្រហម មិនចាំស្លាកលេខ មកធ្វើសកម្មភាពឆក់កាបូបស្ពាយពីជនរងគ្រោះបានសម្រេច ហើយរត់គេចខ្លួនបាត់ស្រមោល ភ្លាមនោះស្រ្តីជនជាតិចិនបានត្រឹមតែឈរស្រែកឲ្យគេជួយ និងបង្កការភ្ញាក់ផ្អើលដល់ពលរដ្ឋនិងសមត្ថកិច្ចមូលដ្ឋានចុះទៅដល់កន្លែងកើតហេតុ ។
ក្រោយកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋចុតមុខ ដើម្បីឲ្យសមត្ថកិច្ចតាមស្រាវជ្រាវតាមចាប់ជនសង្ស័យមកផ្តន្ទាទោសតាមច្បាប់ ៕ ស តារា
