សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មានករណីគ្រោះថ្នាក់ចរាចរណ៍មួយដែលបុរសវ័យក្មេងជិះម៉ូតូម៉ាក zoomer X ដែលជិះក្នុងល្បឿនលឿនបានជ្រុលជាមួយនឹងឡាំប្រាតា ដែលហៅថា ម៉ូតូកង់បីឥណ្ឌាបានដួលបោកក្បាលជាមួយនឹងមួកសុវត្ថិភាព បណ្ដាលឲ្យបែកថ្ងាសហូរឈាមពេញថ្នល់រួចបានបញ្ជូនទៅមន្ទីរភ្លាមៗ ។
ហេតុការណ៍គ្រោះថ្នាក់ចរាចរណ៍នេះ កើតឡើងកាលពីវេលាម៉ោង៧យប់ថ្ងៃពុធ ៦កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៨ ខែកក្កដា ឆ្នាំ២០១៨ ស្ថិតនៅតាមបណ្ដោយផ្លូវ 215 ក្នុងសង្កាត់វាលវង់ ខណ្ឌ 7 មករា រាជធានីភ្នំពេញ។
តាមប្រភពព័ត៌មានបានឲ្យដឹងថា នៅមុនពេលកើតហេតុគេឃើញយុវជនម្នាក់ជិះម៉ូតូម៉ាក zoomer X ពណ៌សលាយនិងពណ៌ទឹកក្រូចពាក់ស្លាកលេខភ្នំពេញ 2GF -0498 ធ្វើដំណើរតាមបណ្ដោយផ្លូវ លេខ215 ក្នុងទិសដៅពីត្បូងទៅជើងគណៈដល់ចំណុចទល់មុខនឹងហាងសមុទ្ររីករាយ (ម្ដុំផ្សារញ៉ែ)ស្ថិតនៅក្នុងសង្កាត់វាលវង់ ខណ្ឌ7មករា ក៏បានឃើញយុវជនម្នាក់នោះជិះក្នុងល្បឿនលឿន ជ្រុលវាក់ជាមួយនិងម៉ូតូកង់បីឥណ្ឌាហើយក៏បានដួលបោកក្បាលបែកថ្ងាសរបួសធ្ងន់តែម្តង។
ក្រោយពេលកើតហេតុកម្លាំងសមត្ថកិច្ចចរាចរណ៍នៃអធិការដ្ឋាននគរបាលខណ្ឌ 7មករាបានចុះមកដល់កន្លែងកើតហេតុភ្លាមៗហើយក៏បានទាក់ទងទៅរថយន្តសង្គ្រោះបន្ទាន់មកទទួលជនរងគ្រោះទៅព្យាបាលនៅមន្ទីរពេទ្យឯកជន ហើយចំណែកឯម៉ូតូរបស់ជនរងគ្រោះត្រូវបានសមត្ថកិច្ចនាំយករក្សាទុកនៅអធិការដ្ឋាននគរបាលខណ្ឌ 7 មករាដើម្បីប្រគល់ជូនសាច់ញាតិរបស់ជនរងគ្រោះ។
សូមបញ្ជក់ផងដែរ នារដូវនេះជារដូវស្សាជារដូវធ្លាក់ភ្លៀងដូច្នះ សូមបងប្អូនធ្វើដំណើរបើកបរដោយការប្រុងប្រយ័ត្ន និងគោរពច្បាប់ចរាចរណ៍ឲ្យបានត្រឹមត្រូវទាំងអស់គ្នា ជៀសវាងកើតនូវគ្រោះថ្នាក់ដល់អាយុជីវិត ៕ ស រស្មី
