សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ចៅក្រមស៊ើបសួរសាដំបូងរាជធានីភ្នំពេញលោក ប៊ុន ធីនៅរសៀល ថ្ងៃព្រហស្បតិ៍ ៧កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៩ ខែកក្កដា ឆ្នាំ២០១៨ បានចេញដីកាបង្គាប់ឲ្យឃុំខ្លួនជនជាតិចិនចំនួន៣នាក់ លើករណីវាយប៉ុនប៉ង សម្លាប់ស្រ្តីខ្មែរ តាមដងផ្លូវនៅសង្កាត់ចោមចៅទី២ខណ្ឌពោធិ៍សែនជ័យ ដាក់ពន្ធនាគារ PJ រង់ចាំក្រុមប្រឹក្សាបើកការជំនុំជម្រះទោសនៅពេលក្រោយ។
ការសម្រេចរបស់លោកចៅក្រម ធ្វើឡើងបន្ទាប់ពីលោក លោក ស៊ិន វីរ: ព្រះរាជអាជ្ញារង បានចោទប្រកាន់បុរសជាតិចិនទាំង៣នាក់ ពីបទ «ប៉ុនប៉ងឃាតកម្ម» តាមមាត្រា២៧ និងមាត្រា១៩៩ នៃក្រមព្រហ្មទណ្ឌ។
តាមសមត្ថកិច្ចបញ្ជាក់ថា មុនកើតហេតុ ក្រុមជនជាតិចិនទាំង៣នាក់នេះ បានយកដែកគាស់ ហើយជិះរថយន្តមួយគ្រឿងពាក់ស្លាកលេខ ខ.ម ធ្វើសកម្មភាពដេញវាយស្រ្តីរងគ្រោះ នៅពេលដែលនាងកំពុងបើករថយន្ត បំណងចូលទៅហូបបាយនៅហាងកាហ្វេមួយកន្លែង ក្នុងខណ្ឌពោធិ៍សែនជ័យ។
ក្រោយហេតុការណ៍ហិង្សានេះ ជនរងគ្រោះត្រូវគេដឹកយកទៅសង្គ្រោះ ចំណែករថយន្តរងការខូចខាតស្ទើរទាំងស្រុង។ តាមសមត្ថកិច្ចបញ្ជាក់ថា ករណីនេះបានកើតឡើងកាលពីវេលាម៉ោង១១និង៤៥នាទី ព្រឹកថ្ងៃទី១៣ ខែកក្កដា ឆ្នាំ២០១៨ មុខហាងកាហ្វេតេស្ត ផ្លូវវេងស្រេង ភូមិចោមចៅ២ សង្កាត់ចោមចៅ២ ខណ្ឌពោធិ៍សែនជ័យ ។
ជនបង្កជាជនជាតិចិនគ្នា៣នាក់ ក្នុងនោះមានឈ្មោះ ចូ ហ្វីលីប អាយុ៤២ឆ្នាំ ធ្លាប់មានគំនុំជាមួយជនរងគ្រោះផងដែរ។ ជនបង្កទាំង៣នាក់ បើករថយន្តមួយគ្រឿង ម៉ាកកាមរីឆ្លាម ពណ៌ស្ករ យកទឹកលុប គូសបិទស្លាកលេខបាត់។
ចំណែកស្រ្តីរងគ្រោះឈ្មោះ ហង់ ចាន់នី អាយុ២៦ឆ្នាំ មុខរបរបុគ្គលិករោងចក្រស្បែកជើង មានទីលំនៅ ផ្ទះ165Eoz ផ្លូវ93 សង្ហាត់មនោរម្យ ខណ្ឌ៧មករា រងរបួសធ្ងន់ ត្រូវបានបញ្ជូនចូលសង្រ្គោះនៅគ្លីនិកភ្លាមៗ។ ជនរងគ្រោះបើករថយន្តមួយគ្រឿងម៉ាក កាមរីបាឡែន ពណ៌ស ពាក់ស្លាកលេខ ភ្នំពេញ2AN-1659។
មុនកើតហេតុ ស្រ្តីរងគ្រោះបើករថយន្ត រួមដំណើរជាមួយស្រ្តីម្នាក់ទៀត បម្រុងចូលទៅហូបបាយនៅហាងកាហ្វេតេស្ត ហើយគ្រាន់តែជនរងគ្រោះចុះពីលើរថយន្ត ស្រាប់តែក្រុមជនបង្ក ប្រដាប់ដោយដែកគាស់ ចំនួន២ដើម បើករថយន្តកាមរីឆ្លាមមកដល់ ធ្វើសកម្មភាពវាយទៅលើស្រ្តីរងគ្រោះ បណ្តាលឲ្យដេកដួលរងរបួសធ្ងន់ ហើយវាយរថយន្តជនរងគ្រោះ បណ្តាលឲ្យបែកកញ្ចក់ខ្ទេចជុំវិញ។
ក្រោយពីធ្វើសកម្មភាពរួច ក្រុមជនដៃដល់បើករថយន្តគេចផ្អើលអស់សមត្ថកិច្ចខណ្ឌពោធិ៍សែនជ័យ ចេញអន្តរាគមន៍ ប្រដេញតាមចាប់ជនបង្ក រហូតដល់ផ្លូវសហព័ន្ធរុស្សីមុខព្រលានយន្តហោះពោធិ៍ចិនតុង ទើបសមត្ថកិច្ចចាប់ឃាត់ខ្លួនបាន៣នាក់ ដកហូតបានវត្ថុតាង មានរថថយន្តរបស់ជនរងគ្រោះ និងដែកគាស់២ដើម ហើយបានកសាងសំណុំរឿងបញ្ជូនមកកាន់តុលាការ តាមនីតិវិធី៕ សុខាសែនជ័យ
