សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ដែលគេស្គាល់ថា ជាតារាចម្រៀងមួយរូបទើបនឹងចេញពីប្រគំតន្រីខនសឺតមួយកន្លែងស្រវឹងស្រាជោកជាំ បើករថយន្តមួយគ្រឿងជ្រុលចង្កូតទៅបុករ៉ឺម៉កម៉ូតូកង់បីមួយគ្រឿងបើកដោយបុរសម្នាក់ពីក្រោយបណ្តាលដាច់ជាពី ម្ចាស់កង់បីរងរបួសធ្ងន់ ។
ហេតុការណ៍នេះកើតឡើងកាលពីវេលាម៉ោង១១ និង៥០នាទីយប់ ថ្ងៃសៅរ៍ ៩កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២១ ខែកក្កដា ឆ្នាំ២០១៨ ស្ថិតនៅចំណុចមុខអាកាសយានដ្ឋានអន្តរជាតិភ្នំពេញ តាមបណ្តោយផ្លូវសហពន្ធរុស្សី ក្នុងសង្កាត់ចោមចៅ៣ ខណ្ឌពោធិសែនជ័យ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញបុរសម្នាក់ដែលស្គាល់ថាជាតារាចម្រៀងបានបើករថយន្តម៉ាកតូយូតាព្រូសពណ៍ស្លែមួយគ្រឿងពាក់ស្លាកលេខ ភ្នំពេញ 2T-6522ទើបនឹងចេញពីប្រគុំតន្ត្រីខនសឺតមួយកន្លែង បានធ្វើដំណើរទិសដៅពីលិចទៅកើតលុះមកដល់ចំណុចកើតហេតុបានជ្រុលចង្កូតទៅបុកម៉ូតូសណ្តោងរ៉ឺម៉កកង់បីស្លាកលេខភ្នំពេញ1AE-6582 ពីក្រោយ ដែលបើកបរដោយបុរសម្នាក់បណ្តាលឲ្យម៉ូតូសណ្តោងរ៉ឺម៉កកង់បីដាច់ជាពីចំណែកម្ចាស់រងរបួសធ្ងន់ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ។ រីឯអ្នកបើករថយន្តបង្កត្រូវបានប្រជាពលររដ្ឋឃាត់ខ្លួននៅ និងកន្លែងកើតហេតុភ្លាមៗរួចបានប្រគល់ជូនទៅសមត្ថកិច្ចផងដែរ ។ ចំណែករថយន្ត និងម៉ូតូខូចខាតយ៉ាងដំណំដូចគ្នា ។
ក្រោយកើតហេតុម្ចាស់រថយន្តបង្កត្រូវបានកម្លាំងសមត្ថកិច្ចនាំខ្លួនទៅប៉ុស្តិ៍នគរបាលរដ្ឋបាលសង្កាត់ចោមចៅ៣ចំណែករថយន្ត និងម៉ូតូសមត្ថកិច្ចជំនាញវាស់វែងយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរងវាំដោះស្រាយគ្នាទៅតាមផ្លូវច្បាប់៕ សុខាសែនជ័យ
