សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តបង្កម៉ាកឡិចស៊ីសLX470មួយគ្រឿង បានបើកទម្លុះរបងផ្ទះប្រជាពលរដ្ឋ និងធ្វើឲ្យរបងផ្ទះរលំកិនរថយន្តតាកូម៉ាមួយគ្រឿងទៀត បណ្ដាលឲ្យរងការខូចខាតយ៉ាងដំណំ សំណាងល្អមិនបង្កឲ្យមនុស្សរងរបួស ។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង១០ និង៤០នាទីយប់ ថ្ងៃសុក្រ ១៥កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៧ ខែកក្កដា ឆ្នាំ ២០១៨ ស្ថិតនៅតាមបណ្ដោយផ្លូវលេខ ៣៣៧ ក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ ។
យោងតាមប្រភពព័ត៌មានពីប្រជាពលរដ្ឋ ដែលរស់នៅក្បែរកន្លែងកើតហេតុបានឲ្យដឹងថា នៅពេលកើតហេតុនោះគឺ ពួកគាត់បានលឺសម្លេងលាន់ដូចរន្ទះ ខណះចេញមកមើលស្រាប់តែឃើញរថយន្តបង្កម៉ាកឡិចស៊ីសLX470 ពណ៌ស ពាក់ស្លាកលេខភ្នំពេញ 2AC-4719 បានជាប់ជាមួយនិងរបង ដោយរបងបានបាក់សង្កត់ពីលើរថយន្តមួយគ្រឿង ម៉ាក TOYOTA ពណ៌ស ពាក់ស្លាកលេខ ភ្នំពេញ 2AF-4558 ដែលចតនៅក្នុងបរិវេណផ្ទះរបស់គេបណ្ដាលឲ្យរងការខូចខាតទាំងរថយន្តបង្ក និងរថយន្តរងគ្រោះ ព្រមទាំងរបងផ្ទះមួយផ្ទាំងយ៉ាងដំណំផងដែរ ។
ក្នុងហេតុការណ៍គ្រោះថ្នាក់ចរាចរណ៍ខាងលើនេះ គេមិនដឹងថា ការបើកបររបស់ម្ចាស់រថយន្តបង្កយ៉ាងណានោះទេ ដោយប្រជាពលរដ្ឋចេញមកមើល ឃើញតែរថយន្តបង្កនៅកន្លែងកើតហេតុ ដោយរងការខូចខាតផ្នែងខាងមុខយ៉ាងដំណំ និងរបងផ្ទះបាក់សង្កត់ពីលើរថយន្តតាកូម៉ា បណ្ដាលឲ្យរងការខូចខាតយ៉ាងដំណំផងដែរ ។
ក្រោយមក សមត្ថកិច្ចមូលដ្ឋានបានចុះមកដល់កន្លែងកើតហេតុ ដោយមិនឃើញភាគីបង្ក និងភាគីរងគ្រោះដោះស្រាយគ្នា ក៏សម្រេចចិត្តវាស់វែង និងហៅរថយន្តស្ទួចរបស់ក្រុមហ៊ុនឯកជន ដើម្បីស្ទួចរថយន្តបង្កយកទៅរក្សាទុកនៅអធិការដ្ឋាន ផ្នែកនគរបាលចរាចរណ៍ខណ្ឌទួលគោក រងចាំដោះស្រាយតាមនីតិវិធីច្បាប់ ៕ ភារ៉ា ដង្កោ
