ជិះម៉ូតូឡើងជែងរថយន្ដខាងមុខ រេចង្កូតចូលរថយន្តបណ្តាលឲ្យបុកយ៉ាងពេញទំហឹងរងរបួសធ្ងន់

ខេត្តឧត្តរមានជ័យ៖ មានករណីគ្រោះថ្នាក់ចរាចរណ៍មួយរវាងរថយន្ត នឹងម៉ូតូ បញ្ច្រាសទិសគ្មាកើតឡើងនៅលើផ្លូវជាតិលេខ ២៥២៦ ចន្លោះគីឡូម៉ែត្រលេខ 48-49 ភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ បណ្តាលឲ្យមនុស្សរបួសធ្ងន់១នាក់ ខូចរថយន្ត១គ្រឿង និងម៉ូតូ១គ្រឿង ។ ហេតុការគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១៦និង៤០នាទី ថ្ងៃអាទិត្យ ២រោច ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៩ ខែកក្កដា ឆ្នាំ២០១៨ ។

សមត្ថកិច្ចបានឲ្យដឹងថា អ្នកបើកម៉ូតូ ឈ្មោះ ជុំ ម៉ាប់ ភេទប្រុស អាយុ១៩ ឆ្នាំ រស់នៅភូមិពេលសែនជ័យ ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ មុខរបរ ជាយោធា បើកបរម៉ូតូម៉ាក ឌ្រីមសង់ C125 ពណ៌ខ្មៅ ពាក់ស្លាកលេខ សៀមរាប 1T.3733 បណ្តាលឲ្យបាក់ភ្លៅទាំងសងខាង និងបាក់កំភួនដៃខាងឆ្វេងទៀតផង។

រីឯអ្នកបើកបររថយន្ត ឈ្មោះ ហេង សីុថន ភេទ ប្រុស អាយុ ៤៣ ឆ្នាំ រស់នៅភូមិចំបក់ ឃុំកន្ទួត ស្រុកជាំក្សាន្ត ខេត្តព្រះវិហារ មុខរបរ យោធា បើកបររថយន្តម៉ាក ម៉ាស់ស្តាពណ៌ស ពាក់ស្លាកលេខ ភ្នំពេញ2AC.2829 ពុំរងរបួសទេ ។

ករណីនេះ មូលហេតុបណ្តាលមកពីម៉ូតូជែងរថយន្ត១ គ្រឿងដែលកំពុងចរាចរណ៍ខាងមុខ រេចង្កូតចូលចំណែកផ្លូវរថយន្ត ដែលកំពុងធ្វើដំណើបញ្ច្រាសទិសគ្នា។

ក្រោយកើតហេតុ កម្លាំងជំនាញ បានចុះអន្តរាគមន៍វាស់វែង និងបញ្ជូនអ្នករងគ្រោះទៅមន្ទីរពេទ្យ រីឯវត្ថុតាងទាំងពីរ សមត្ថកិច្ចយកមករក្សាទុកនៅអធិការដ្ឋាននគរបាលដើម្បីចាត់ការនីតិវិធី ៕ ប៉ែន នួន