សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យមួយក្រុមមានគ្នាជិត១០នាក់ បានធ្វើសកម្មភាពវាយប្លន់យកម៉ូតូពីយុវជនម្នាក់បានម្រេចហើយគេចខ្លួនបាត់ដោយសុវត្ថិភាពកាលពីវេលាម៉ោង៣និង៤០នាទីយប់ជិតភ្លឺ ថ្ងៃទី៣១ ខែកក្កដា ឆ្នាំ២០១៨ តាមបណ្ដោយផ្លូវ២០០៤ ដែលស្ថិតនៅភូមិគោកចំបក់ សង្កាត់ចោមចៅ១ ខណ្ឌពោធិ៍សែនជ័យ ។
ជនរងគ្រោះមានឈ្មោះ សួន សាន ភេទប្រុស អាយុ២១ឆ្នាំ មុខរបរបុគ្គលិកខារ៉ាអូខេ ស្នាក់នៅភូមិកន្លែងធ្វើការ ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើតនៅភូមិថ្មី ឃុំកុមាររាជា ស្រុកបាទី ខេត្តតាកែវ ។
តាមប្រភពព័ត៌មានពីជនរងគ្រោះបាននិយាយថា នៅមុនពេលកើតហេតុពេលចប់ម៉ោងរូបគាត់បានចេញមកពីកន្លែងធ្វើការនៅខារ៉ាអូខេ ហើយបានជិះម៉ូតូម៉ាកស៊ុយសូគីនិច ពណ៌ស សេរី២០១៤ មិនចាំស្លាកលេខ ទៅលេងមិត្តភក្តិ និងសង្សារ ជិតកន្លែងកើតហេតុ លុះគាត់ជិះម៉ូតូមកដល់ចំណុចកើតហេតុស្រាប់តែមានជនសង្ស័យប្រមាណជិត១០នាក់ ដោយមានម៉ូតូម៉ាកហុងដាឌ្រីមចំនួន២គ្រឿង នឹងម៉ូតូ២គ្រឿងទៀតមិនចាំម៉ាក ដោយជនសង្ស័យជិះម៉ូតូម៉ាកហុងដាឌ្រីមមួយគ្រឿងគ្នា២នាក់ ជិះកាត់ពីមុខ ហើយជនសង្ស័យដែលជិះពីក្រោយបានស្រែកថា ម៉េចហែងវាយប្អូនអញ ហើយជនសង្ស័យខាងលើ បានយកខ្សែក្រវាត់មកវាយរូបគាត់ បណ្តាលឲ្យរងរបួសស្នាមខ្នង បន្ទាប់មកជនរងគ្រោះខាងលើបានចុះពីលើម៉ូតូ ហើយរត់ចោលម៉ូតូ ហើយភ្លាមៗនោះជនសង្ស័យផ្សេងទៀត បានលើកម៉ូតូរបស់គាត់ ហើយជិះគេចខ្លួនបាត់ ។
ក្រោយពេលកើតហេតុជនរងគ្រោះខាងលើបានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចោមចៅ១ ដើម្បីឲ្យសមត្ថកិច្ចជួយស៊ើបអង្កេតតាមរកជនសង្ស័យមកផ្តន្ទាទោសតាមច្បាប់ ៕ សុខាសែនជ័យ
