សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ បុរសម្នាក់បានស្លាប់ពេលបញ្ជូនទៅសង្រ្គោះ បន្ទាប់ពីរងនូវការកាប់ប្រហារពីសំណាក់ក្មេងស្ទាវមួយក្រុមពេលរាំធុងបាស់ ។
ហេតុការណ៍នេះ បានកើតឡើងនៅវេលាម៉ោងរំលងអធ្រាត្រ ឈានចូលថ្ងៃអង្គារ ៤រោច ខែទុតិយាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី៣១ ខែកក្កដា ឆ្នាំ២០១៨ នៅចំណុចទំនប់ព្រៃទីទុយ ភូមិព្រៃទីទុយ ឃុំយាអង្គ ស្រុកថ្ពង ខេត្ត កំពង់ស្ពឺ ។ ការកាប់សម្លាប់គ្នា ផ្តើមចេញពីរឿងគំនុំគុំកួន បណ្តាលឲ្យបុរសម្នាក់ បានស្លាប់ ក្នុងថ្លុកឈាម ក្នុងវិធីចាក់ធុងបាសរាំលេងសប្បាយ ។
តាមសម្តីរបស់ស្ត្រីឈ្មោះឈួន សាន់នី អាយុ៣៣ឆ្នាំ ជាប្រពន្ធជនរងគ្រោះមានឈ្មោះ ហម ស្រស់ អាយុ៣១ឆ្នាំ មុខរបរកសិករ រស់នៅក្នុងភូមិព្រៃទីទុយ ឃុំយាអង្គ ស្រុកថ្ពង ខេត្តកំពង់ស្ពឺ បាននិយាយឲ្យដឹងថា ប្តីរបស់នាងត្រូវបានក្រុមក្មេងស្ទាវជាច្រើននាក់ បានស្ទាក់កាប់សម្លាប់ប្តីរបស់គាត់ ដោយសារតែនៅក្នុងភូមិ មានកម្មវិធីចាក់ធុងបាស់រាំ លេងសប្បាយ ហើយក៏មានមនុស្ស ចូលរួមរាំលេង មកពីភូមិជាច្រើន ដូចជាភូមិពាណិជ្ជ ភូមិទួលថ្មីជាដើម រហូតដល់មានទំនាស់តែម្តង ។
នៅក្នុងកម្មវិធីរាំធុងបាស់ មានក្មេងៗ ជាច្រើនមកពីភូមិទួលថ្មី និងក្មេងៗ មកពីក្នុងភូមិពាណិជ្ជជាច្រើន មករាំលេងផងដែរ ហើយក៏ស្រាប់តែរំលងអាធ្រាត្រឈានចូលថ្ងៃទី៣១ ខែកក្កដា ឆ្នាំ២០១៨ មានក្រុមក្មេងៗ ជិះម៉ូតូចេញពីកន្លែងរាំលេងធុងបាស់នោះ ហើយក៏មានការភ្ញាក់ផ្អើលថា មានការវាយ តប់គ្នាកាប់ចាក់គ្នា បណ្តាលឲ្យបុរសជាជនរងគ្រោះខាងលើ រងរបួសត្រូវគេកាប់មួយ កាំបិតចំក្បាលលើត្រចៀកខាងឆ្វេង របួសធ្ងន់ធ្ងរហូរឈាមជោគខ្លួន ហើយក្រុមអ្នក ភូមិព្រៃទីទុយ បាននាំគ្នារត់ដេញក្រុមក្មេងស្ទាវ មកពីភូមិពាណិជ្ជ និងមកពីភូមិទួលថ្មី រហូតមកដល់ទំនប់អូរខ្យាទើប ត្រឡប់ទៅផ្ទះវិញបានឃើញបុរសឈ្មោះ ហម ស្រស់ របួសធ្ងន់ធ្ងរ ហើយក៏បានដឹកយកទៅព្យាបាល នៅគ្លីនិកឯកជន មួយកន្លែង ដោយស្នាម របួសធ្ងន់ធ្ងរពេក បណ្តាលឲ្យស្លាប់តែម្តង ៕ សេនាស័ក្តិ
