សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល ៖ នគរបាលស្រុពញាឮ បានឃាត់ខ្លួនបុរសម្នាក់ ក្រោយធ្វើសកម្មភាពប្រទូស្តកេរ្តិ៍ខ្មាស់លើក្មេងស្រីអាយុ១៤ឆ្នាំម្នាក់ នៅវេលាម៉ោង៣ និង ៣០នាទីរសៀលថ្ងៃ អង្គារ ៤ រោច ខែ ទុតិយាសាឍ ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃ ថ្ងៃទី១ ខែសីហា ឆ្នាំ២០១៨ ត្រង់ចំណុចសហគមន៍បុរីកីឡា ក្នុងភូមិស្រះពោធិ៍ ឃុំផ្សារដែក ស្រុកពញាឮ ខេត្តកណ្តាល។
នគរបាកស្រុកពញាឮបានឲ្យដឹងថា ជនរងគ្រោះឈ្មោះ ខ-ល-ណ មានអាយុ១៤ឆ្នាំ ។ ចំណែកជនសង្ស័យមានឈ្មោះ ហៀង ចាន់ធី ភេទប្រុស អាយុ៣៥ឆ្នាំ មុខរបរគ្មាន មានទីលំនៅ ភូមិស្រះពោធិ៍ ឃុំផ្សារដែក ស្រុកពញាឮ ខេត្តកណ្តាល។
យោងតាមពាក្យបណ្តឹងរបស់អាណាព្យាបាល ក្មេងស្រីរងគ្រោះបានឲ្យដឹងថា មុនពេលកើតហេតុនេះ ជនរងគ្រោះកំពុងដេកក្រោមផ្ទះខ្លួនជាមួយប្អូនប្រុសឈ្មោះ ខា ឈីត អាយុ១២ឆ្នាំ ហើយ នៅពេលកំពុងដេកលក់ ស្រាប់តែជនសង្ស័យមិនដឹងមកពីណាបានចូលទៅក្រោមផ្ទះរួចយកដៃមកស្ទាបកេរ្តិ៍ខ្មាសក្មេងស្រីរងគ្រោះធ្វើឲ្យនាងភ្ញាក់ ងើបពីដេកមិនឃើញមានអ្វី ព្រោះជនសង្ស័យរត់ពួនក្បែរនោះ ហើយនឹកស្មានថាដៃប្អូនប្រុស របស់នាងដេកក្បែរគ្នាប៉ះ នាងក៏ប្រាសខ្លួនដេកវិញ ។ លុះបានមួយសន្ទុះជនសង្ស័យរូបនេះ បានចូលទៅជិតនាងយកដៃប្រទូស្តកេរិ៍្តខ្មាសនាងម្តងទៀត ធ្វើឲ្យនាងភ្ញាក់ដឹងខ្លួនឃើញជនសង្ស័យកំពុងឈរនៅចុងជើងទើបនាងទៅប្រាប់ម្តាយនិងពូ។
ពេលដឹងរឿងបែបនេះទើបពូរបស់ក្មេងស្រីរងគ្រោះ បានរាយការណ៍ប្រាប់សមត្ថកិច្ចប៉ុស្តិ៍ផ្សារដែកហើយក្រោយមកកម្លាំងសមត្ថកិច្ចប៉ុស្តិ៍បានចុះទៅកន្លែងកើតហេតុបានឃាត់ខ្លួនជនសង្ស័យបញ្ជូនមកកាន់អធិការដ្ឋាននគរបាលស្រុកពញាឮ ដើម្បីសាកសួរនិងកសាងសំណុំរឿងចាត់ការតាមនីតិវិធីច្បាប់៕ ស្អាងជ័យ
