ស្ត្រីម្នាក់ស្លាប់ និងនារី២នាក់ទៀតរបួសធ្ងន់ ខណៈរថយន្តម៉ាកហ៊ីយ៉ាន់ដាយ បើកបុកពីក្រោយម៉ូតូ

ខេត្តកំពង់ចាម៖ ស្ត្រីម្នាក់បានស្លាប់យ៉ាងអាណោចអាធ័ម និងនារី២នាក់ទៀតរងរបួសធ្ងន់ ខណៈដែលកំពុងតែជិះម៉ូតូមួយគ្រឿងឌុបគ្នាតាមផ្លូវ ស្រាប់តែត្រូវរថយន្តម៉ាកហ៊ីយ៉ាន់ដាយធុនធំមួយគ្រឿង បានបើកមកបុកពីក្រោយម៉ូតូម៉ាកហុងដាវ៉េវ ទាំងកំរោល ។

ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៦និង៣០នាទីព្រឹកថ្ងៃព្រហស្បតិ៍ ៦រោច ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹង ថ្ងៃទី២ ខែសីហា ឆ្នាំ២០១៨ នៅចំណុចផ្លូវជាតិលេខ៦ ចន្លោះគីឡូម៉ែត្រលេខ៦៦-៦៧ ភូមិឈូក ឃុំគោករវៀង ស្រុកជើងព្រៃ ខេត្តកំពង់ចាម។

រថយន្តបង្កម៉ាកហ៊ីយ៉ាន់ដាយ ពាក់ស្លាកលេខ កំពង់ចាម 3A-៥២៧៩ បើកបរដោយឈ្មោះ ណយ នីម ភេទប្រុស អាយុ៥៥ឆ្នាំ ទីលំនៅភូមិខ្វិត ឃុំតាំងក្រសាំង ស្រុកបាធាយ ខេត្តកំពង់ចាម បើកបរក្នុងទិសដៅពីលិចទៅកើត ទៅបុកម៉ូតូមួយគ្រឿងម៉ាកហុងដាវ៉េវ(ឆ្លាម) គ្មានស្លាកលេខ ជិះដោយស្រី្ត៣នាក់ បណ្តាលឲ្យម្នាក់ស្លាប់ និង២នាក់ទៀតរបួសធ្ងន់នោះ ត្រូវបានរថយន្តសាមុយដឹកបញ្ជូនទៅសង្គ្រោះនៅមន្ទីរពេទ្យបង្អែកស្រុកជើងព្រៃផងដែរ ។

ក្រោយកើតហេតុអ្នកបើកបររថយន្តបង្ក ត្រូវបានសមត្ថកិច្ចឃាត់ខ្លួន និងវាស់វែងយកម៉ូតូនិងរថយន្ត ទៅរក្សាទុកនៅអធិការដ្ឋាននគរបាលស្រុកជើងព្រៃ ដើម្បីចាត់ការតាមនីតិវិធីច្បាប់ ៕សហការី