រថយន្តដឹកទឹកកក បួងចង្កូតជ្រុលក្រឡាប់ផ្ងារជើង

ភ្នំពេញ៖ រថយន្តកូរ៉េដឹកទឹកកកមួយគ្រឿង បើកក្នុងល្បឿនលឿនបួងចង្កូតជ្រុល ក្រឡាប់ផីងបោកទៅលើសួនទ្រូងផ្លូវ រងការខូចខាត។
​
ហេតុការណ៍​នេះបានកើតឡើង កាលពីវេលាម៉ោង៦ព្រឹក ថ្ងៃទី០៧ ខែសីហា ឆ្នាំ២០១៨ ស្ថិតនៅលើផ្លូវទំនប់កប់ស្រូវ កែងផ្លូវចូលផ្សារសាមគ្គី ភូមិជង្រុក សង្កាត់ត្រពាំងក្រសាំង ខណ្ឌពោធិសែនជ័យ ។

តាមប្រភពនៅកន្លែង បានឲ្យដឹងថា មុនកើតហេតុ គេបានឃើញរថយន្តកូរ៉េ ម៉ាកKIA ពណ៌ស 2AG-3479 បើកបរដោយបុរសម្នាក់មិនស្គាល់ឈ្មោះ ដែលទើបវិលមកពីដាក់ទម្លាក់ទឹកកកឲ្យម៉ូយនៅផ្សារសាមគ្គីវិញ បើកចេញពីផ្លូវលំលផ្សារសាមគ្គី ឡើងមកផ្លូវទំនប់កប់ស្រូវ ល្បឿនលឿន ហើយបត់ឆ្វេង បំណង់បត់ឆ្ពោះទៅជើង តែដោយសារការធ្វេសប្រហែស របស់អ្នកបើកបរ ទើបបួងចង្កូតជ្រុល បែជាទាញក្រឡាប់បោកទៅលើសួន ទ្រូងផ្លូវ បណ្តាលឲ្យរថយន្តរងខូចខាត តែសំណាងល្អមិនបង្កគ្រោះថ្នាក់ដល់អ្នកដទៃ ។

ក្រោយកើតហេតុ ខណៈដែល គ្រោះថ្នាក់ដោយខ្លួនឯង មិនប៉ះពាល់ ខូចខាតដល់ទ្រព្យរដ្ឋ និងប៉ះពាល់ដល់អ្នកដទៃ រថយន្តខាងលើ សមត្ថកិច្ចអនុញាតិឲ្យ ម្ចាស់រករថយន្តស្ទូចមកលើកយកទៅជួសជុលដោយខ្លួនឯង ៕ សុខាសែនជ័យ