សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ យុវជន២នាក់ បានរងរបួសយ៉ាងទ្រមខ្លួនស្ទើរតែអស់ជីវិត ដោយសារពលរដ្ឋនាំគ្នាភ្ញាក់ផ្អើលចោមរោមមើលនិងវាយទាត់ធាក់ ខណៈដែលកម្លាំងនគរបាលប៉ុស្តិ៍ទំនប់ទឹក ខណ្ឌចំការមន បានជិះល្បាតការពារសុវត្ថិភាពជូនពលរដ្ឋក្នុងមូលដ្ឋាន លុះជិះមកដល់ចំណុចផ្លូវលេខ៥១ ក៏ប្រទះឃើញយុវជន២នាក់ជិះម៉ូតូមួយគ្រឿងឌុបគ្នាយ៉ាងលឿន ដោយក្នុងហេតុការណ៍ព្រមទាំងសម្រែកថា ចោរៗទៀត ភ្លាមនោះសមត្ថកិច្ចក៏បានដេញតាមជនសង្ស័យ រហូតមកដល់ប្លុកបឹងកក់វិហារអ៊ិស្លាម ក្នុងសង្កាត់ស្រះចក ខណ្ឌដូនពេញ ទើបឃាត់ខ្លួនបាន២នាក់ នាំយកទៅសាកសួរ ។
ហេតុការណ៍នេះ កើតឡើងកាលពីវេលាម៉ោង១១ និង៣០នាទីយប់ថ្ងៃចន្ទ ២កើត ខែស្រាពណ៍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១២ សីហា ស្ថិតនៅតាមផ្លូវបេតុងចំណុចប្លុកបឹងកក់ ស្ថិតក្នុងសង្កាត់ស្រះចក ខណ្ឌដូនពេញ ។
តាមប្រភពព័ត៌មានពីសាក្សីឃើញហេតុការណ៍នេះ បានឱ្យដឹងថា មន្ត្រីនគរបាលប៉ុស្តិ៍ទំនប់ទឹកម្នាក់ ខណៈកំពុងល្បាតតាមផ្លូវលេខ៥១ ស្រាប់តែប្រទះឃើញជន២នាក់ជិះម៉ូតូមួយគ្រឿងម៉ាកស្មាស ពណ៌ក្រហមលាយខ្មៅ ពាក់ផ្លាកលេខ ភ្នំពេញ ១CK-៤៣៨១ បើកតាមផ្លូវលេខ៥១ពីខាងត្បូងទៅខាងជើង ហើយមានគេតាមស្រែកពីក្រោយថាចោរៗ ។
ពេលនោះ មន្ត្រីនគរបាលរូបនេះក៏ជួយដេញតាម រហូតទៅដល់ម្តុំវិហារអ៊ិស្លាមបឹងកក់ ទើបឃាត់ខ្លួនបាន តែជនសង្ស័យក៏ត្រូវអ្នកចោមរោមមើល បានព្រួតវាយម្នាក់មួយដៃម្នាក់មួយជើង រហូតរងរបួសយ៉ាងដំណំ ។
ទោះបីជាត្រូវចោទថាជា ចោរក្តី តែយុវជនទាំង២នាក់បានឆ្លើយប្រកែកថា ពួកគេមិនមែនជាចោរឆក់ទេ គឺទើបតែចេញមកពីផ្លូវស្ពានអាកាស៥មករា ក៏មានជនសង្ស័យ៤នាក់ ជិះម៉ូតូហុងដាឌ្រីម២គ្រឿងដេញវាយ រួចហើយស្រែកថា «ចោរៗ» ទើបពួកគេបើកម៉ូតូរត់គេចខ្លួនក៏ជួបរឿងបែបនេះតែម្តង ។ ក្រោយពេលកើតហេតុ សមត្ថកិច្ចបានឃាត់ខ្លួនជនសង្ស័យទាំង២នាក់យកទៅប៉ុស្តិ៍នគរបាលបឹងកេងកងទី១ ដើម្បីសាកសួរទៅតាមនីតិវិធី តើជាជនរងគ្រោះមែនឬជាចោរ ។
ក្រោយឃាត់ខ្លួន នៅព្រឹកថ្ងៃទី១៣ សីហា យុវជន២នាក់ខាងលើនេះ ត្រូវបានសមត្ថកិច្ចរកឃើញថាពួកគេមិនជាប់ពាក់ព័ន្ធនឹងករណីចោរលួច ឆក់ នោះទេព្រោះគ្មានអ្នកដាក់ពាក្យបណ្តឹង ទើបធ្វើកិច្ចសន្យាអប់រំឲ្យត្រលប់ទៅផ្ទះវិញ ៕ស រស្មី
