សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់បានរើសកាបូបលុយរបស់ប្រុសស្រីពីរនាក់ ហើយព្យាយាមជិះម៉ូតូគេចខ្លួនពីចំណុចមុខផ្សារសូរិយា តាមបណ្តោយផ្លូវលេខ១៥៤ ស្ថិតក្នុងសង្កាត់ផ្សារថ្មីទី២ ខណ្ឌដូនពេញ រហូតមកដល់មុខមន្ទីរពេទ្យផ្តល់ឈាម តាមបណ្តោយផ្លូវលេខ២៧១ ស្ថិតក្នុងសង្កាត់ទំនប់ទឹក ខណ្ឌចំការមន ត្រូវបានសមត្ថកិច្ចឃាត់ខ្លួនបាន ដោយបង្កការភ្ញាក់ផ្អើលដល់ប្រជាពលរដ្ឋកាលពីវេលាម៉ោង១១ និង២០នាទីយប់ ថ្ងៃពុធ ៤កើត ខែស្រាពណ៌ ឆ្នាំច សំរឹទ្ធិស័ក្រ ព.ស ២៥៦២ ត្រូវនឹងថ្ងៃទី១៥ ខែសីហា ឆ្នាំ២១៨ ។
ជនសង្ស័យឈ្មោះ ឆោម ចាន់ណាយ ភេទប្រុស អាយុ៣៧ឆ្នាំ មុខរបមិនពិតប្រាកដ ស្នាក់នៅម្តុំលូប្រាំ សង្កាត់ស្ទឹងមានជ័យទី៣ ខណ្ឌមានជ័យ និងមានស្រុកកំណើតនៅភូមិពោធិចិនដាំ ឃុំពោធិចិនដាំ ស្រុកស្វាយទន្ទ ខេត្តព្រៃវែង ។
តាមប្រភពព័ត៌មានបានឲ្យដឹងថា មុនពេលកើតហេតុមានបុរសម្នាក់ជិះម៉ូតូធូដេឌុបនារីម្នាក់ធ្វើដំណើរតាមបណ្តោយផ្លូវលេខ១៥៤ ក្នុងទិសដៅពីជើងទៅត្បូង ខណះមកដល់ចំណុចកើតហេតុមិនប្រយ័ត្ន ក៏បានជ្រុះកាបូបលុយ ហើយបំរុងឈប់រើសវិញ ស្រាប់តែមានជនសង្ស័យម្នាក់ជិះម៉ូតូម៉ាក់ហុងដាឌ្រីម សង់ស៊េរីឆ្នាំ២០១០ ពណ៍ខ្មៅ ពាក់ស្លាកលេខភ្នំពេញ1BG 1532 ធ្វើដំណើរមកពីក្រោយក៏រើសយក ហើយព្យាយាមជិះម៉ូតូគេចខ្លួន តែត្រូវម្ចាស់កាបូបស្រែកឲ្យជួយឃាត់ និងមានប្រជាពលរដ្ឋជួយដេញពីចំណុចកើតហេតុ រហូតមកដល់ចំណុចមុខមន្ទីរពេទ្យផ្តល់ឈាម ស្ថិតក្នុងសង្កាត់ទំនប់ទឹក ក៏ជួបសមត្ថកិច្ចកំពុងយាមគោលដៅ ក៏ឃាត់បានតែម្តង។
ក្រោយពេលកើតហេតុ ជនសង្ស័យត្រូវបាននគរបាលប៉ុស្តិ៍ទំបន់ទឹក យកទៅសាកសួរ រួមប្រគល់ជូនសមត្ថកិច្ចប៉ុស្តិ៍ផ្សារថ្មីទី២ ដើម្បីយកទៅសួរនាំនិងចាត់ការតាមច្បាប់៕ ភារ៉ា ដង្កោ
