សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ នៅព្រឹក ថ្ងៃទី១៧ ខែសីហា ឆ្នាំ២០១៨ ក្នុងសាលប្រជុំរបស់ មន្ទីរសុខាភិបាលខេត្ត លោក ផាន់ ចាន់ធុល អភិបាលខេត្តប៉ៃលិន អមដំណើរដោយ លោក ហែម ឫទ្ធី អភិបាលរងខេត្ត និងលោក ហុក សុផល អភិបាលរងខេត្ត បានអញ្ជើញជួបសំណេះសំណាលជាមួយថ្នាក់ដឹកនាំ មន្រ្តីរាជការ នៃមន្ទីរសុខាភិបាល ខេត្តប៉ៃលិន ដើម្បីពង្រឹងប្រសិទ្ធភាពការងារ និងការផ្តល់សេវ៉ាសុខាភិបាលជូនដល់ប្រជាពលរដ្ឋ ប្រកបដោយក្រមសីលធម៌ និងវិជ្ជាជីវៈ ជាពិសេសគឺបង្កើនភាពស្និទស្នាលរវាងថ្នាក់ដឹកនាំមន្ទីរជាមួយមន្រ្តីរាជការក្រោមឱវាទ។
នៅក្នុងពីធីសំណេះសំណាលនោះ លោក ផាន់ ចាន់ធុល អភិបាលខេត្តប៉ៃលិន បានមានប្រសាសន៍លើកឡើងថា៖ ការធ្វើឲ្យប្រជាពលរដ្ឋកាន់តែមានជំនឿជឿជាក់លើវិស័យសុខាភិបាល គឺមន្ទីរសុខាភិបាលខេត្ត ដែលគ្រប់គ្រងទៅលើមន្ទីរពេទ្យ ត្រូវ អប់រំមន្រ្តីរបស់ខ្លួនមួយចំនួនតូចដែលមិនយកចិត្តទុកដាក់ ពិនិត្យព្យាលបាលអ្នកជំងឺ ត្រូវកែប្រែឥរិយាបថដោយអនុវត្តន៍តាមជំនាញ និងក្រមសីលធម៌វិជ្ជាជីវៈរបស់គ្រូពេទ្យ ពីកន្លងមកក្រុមគ្រូពេទ្យខ្លះ មានឥរិយាបទមិនសមរម្យទៅលើអ្នកជំងឺ ជាពិសេសមន្ទីរពេទ្យមួយចំនួនត្រូវតែកាត់បន្ថយការធ្វើឯកសារផ្សេងៗ ឬទាលុយពីអ្នកជម្ងឺ ដោយត្រូវពិនិត្យ និងព្យាបាលអ្នកជំងឺជាមុនសិន សម្រាប់អ្នកជំងឺដែលត្រូវសង្រ្គោះ។
លោក អភិបាលខេត្ត បានមានប្រសាសន៍សង្កត់ធ្ងន់ថា៖ ការកែប្រែសកម្មភាពអវិជ្ជមានទាំងអស់នេះនឹងធ្វើឲ្យការថ្នាំងថ្នាក់របស់ប្រជាពលរដ្ឋមកលើវិស័យសុខាភិបាលនៅក្នុងខេត្ត និងថ្នាក់ដឹកនាំខេត្ត កាន់តែត្រូវកាត់បន្ថយ ហើយម៉្យាងទៀត បានធ្វើឲ្យខេត្តប៉ៃលិន ជាខេត្តគំរូក្នុងការជួយពិនិត្យព្យាបាលជំងឺជូនប្រជាពលរដ្ឋបានល្អប្រសើរ។ នៅក្នុងឱកាសនោះផងដែរ លោក ផាន់ ចាន់ធុល ក៍បានផ្តាំផ្ញើឲ្យមន្ទីរសុខាភិបាលខេត្ត ត្រូវធ្វើយ៉ាងណាផ្សព្វផ្សាយឲ្យបានទូលំទូលាយដល់ប្រជាពលរដ្ឋអំពីការរីកចម្រើន និងការផ្តល់សេវ៉ានានា លើវិស័យសុខាភិបាល ដើម្បីធ្វើយ៉ាងណាឲ្យប្រជាពលរដ្ឋដែលមានបញ្ហាសុខភាពចូលរួមពិគ្រោះពិនិត្យ និងព្យាបាលនៅមន្ទីរពេទ្យរដ្ឋកាន់តែច្រើនឡើងថែមទៀត ។
តាមរបាយការណ៍របស់ លោក អាង នាង ប្រធានមន្ទីរសុខាភិបាលខេត្តប៉ៃលិន បានឲ្យដឹងថា៖ នៅខេត្តប៉ៃលិន បច្ចុប្បន្នមានមន្ទីរពេទ្យបង្អែកចំនួន ១ និងមណ្ឌលសុខភាពចំនួន ៦ ក្នុងនោះនៅក្រុងប៉ៃលិនចំនួន ៣ នៅស្រុកសាលាក្រៅចំនួន ៣៕ ស សារ៉េត
