សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បង្គោលខ្សែភ្លើងមួយដើម ស្ថិតក្នុងមូលដ្ឋានសង្កាត់បឹងកក់ទី១ ខណ្ឌទួលគោក បានឆ្លងចរន្តអគ្គិសនីឆាបឆេះខ្ទេច បង្កការភ្ញាក់ផ្អើលដល់ពលរដ្ឋ និងសមត្ថកិច្ចមូលដ្ឋានចុះទៅធ្វើអន្តរាគមន៍បាញ់ទឹកពន្លត់ឲ្យរលត់ទៅវិញភ្លាមៗ ដោយមិនរាលដាលដល់ផ្ទះប្រជាពលរដ្ឋនោះទេ។
ករណីឆ្លងចរន្តអគ្គិសនីខាងលើនេះ បានកើតឡើងកាលពីវេលាម៉ោង៥ និង៣០នាទីល្ងាច ថ្ងៃព្រហស្បតិ៍ ១២កើត ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៣ ខែសីហា ឆ្នាំ២០១៨ នៅតាមបណ្តោយផ្លូវលេខ២៨៧ កែងផ្លូវលេខ៥៦៤ សង្កាត់បឹងកក់១ ខណ្ឌទួលគោក រាជធានីភំ្នពេញ។
ប្រភពព័ត៌មានបានឲ្យដឹងថា មុនពេលកើតហេតុ គេបានឃើញមានផ្សែងហ៊ុយៗចេញពីបង្គោលភ្លើង រួចក៏ឆាបឆេះយ៉ាងសន្ធោសន្ធៅតែម្តង។ ភ្លាមៗនោះ ប្រជាពលរដ្ឋនៅក្បែរទីតាំងខាងលើ បាននាំគ្នាយកបំពុងពន្លត់អគ្គិភ័យមកបាញ់ពន្លត់តែមិនរលត់សោះ ក៏បាននាំគ្នាយកទុយយោទឹកបាញ់បន្ថែមទៀតនៅតែមិនបានផលទៀត ទើបរាយការណ៍ទៅសមត្ថកិច្ចមូលដ្ឋានឲ្យចុះមកជួយអន្តរាគមន៍ និងហៅរថយន្តពន្លត់អគ្គិភ័យមកបាញ់ទឹកពន្លត់បន្ថែមទៀតផងដែរ។
ក្រោយពីសមត្ថកិច្ចជំនាញផ្នែកពន្លត់អគ្គិភ័យចុះមកអន្តរាគមន៍បាញ់ទឹកពន្លត់អស់ទឹកមួយស៊ីទែន នៅវេលាម៉ោង៦ល្ងាចថ្ងៃដដែរ ភ្លើងក៏បានរលត់ទៅវិញជាស្ថាពរ។
សមត្ថកិច្ចបានប្រាប់ឲ្យដឹងទៀតថា ករណីអគ្គិភ័យខាងលើបានឆាបឆេះអស់បង្គោលភ្លើងមួយដើម តែសំណាងល្អមិនបង្កឲ្យមនុស្សរងគ្រោះថ្នាក់ និងមិនរាលដាលដល់ផ្ទះប្រជាពលរដ្ឋនៅក្បែនោះទេ៕ ស តារា
