សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ អតីតថៅកែសណ្ឋាគារឆាយហុង បានបើកម៉ូតូទឹកដែលទើបទិញថ្មី ជិះលំហែលកាយតាមដងទន្លេមេគង្គ រួចធ្លាក់ទឹកទន្លេលិចបាត់រយៈពេល២ថ្ងៃមកហើយ រកសាកសពមិនឃើញ ។
ហេតុការណ៍នេះ ត្រូវបានសមត្ថកិច្ចនគរបាលប្រាប់ឲ្យដឹងថា បានកើតឡើងតាំងពីល្ងាចថ្ងៃទី២៦ ខែសីហា ឆ្នាំ២០១៨ មកម៉្លេះ នៅតាមដងទន្លេមេគង្គ ស្ថិតក្នុងភូមិល្វា សង្កាត់កោះដាច់ ខណ្ឌជ្រោយចង្វា ហើយរហូតមកដល់រសៀលថ្ងៃទី២៨ ខែសីហា ឆ្នាំ២០១៨នេះ រកសាកសពជនរងគ្រោះមិនទាន់ឃើញ។
សមត្ថកិច្ចបានឲ្យដឹងថា ជនរងគ្រោះដែលគេអះអាងថា បានធ្លាក់ទឹកស្លាប់នោះ ឈ្មោះហុក ប៊ុនហ៊ុយ ហៅ តាហ៊ុយ មានអាយុ ជាង៤៧ឆ្នាំ ជាអតីតថៅកែសណ្ឋាគារឆាយហុង និងបច្ចុប្បន្នជាថៅកែហាងគុយទាវមួយកន្លែង នៅក្នុងភូមិព្រែកលៀប សង្កាត់ព្រែកលៀប ខណ្ឌជ្រោយចង្វា ។
ប្រភពព័ត៌មានពីសមត្ថកិច្ចគរបាលបានឲ្យដឹងទៀតថា អតីតថៅកែសណ្ឋាគាររូបនេះបានបើកម៉ូតូទឹក ដែលទើបទិញក្នុងតម្លៃជិត២ម៉ឺនដុល្លារលំហែកាយតាមដងទន្លេ ។ មិនដឹងជាមូលហេតុអ្វីនោះទេ ខណៈបើកបរបានធ្លាក់ទឹកលិចបាត់ ហើយម៉ូតូទឹកក៏បានអណ្តែតតាមទឹកចូលខាង ហើយត្រូវនគរបាលយកទៅរក្សាទុក ។ ក្រោយមក ទើបមានការភ្ញាក់ផ្អើលដល់ក្រុមគ្រួសារនាំគ្នាជួលទូកជួយរក តែរកពុំឃើញសោះ ។
សមត្ថកិច្ចបានឲ្យដឹងទៀតថា ខែនេះជារដូវទឹកឡើង ទឹកហូរខ្លាំង មិនដឹងថា សាកសពបានអណ្តែតទៅដល់ទីណានោះទេ ហើយសមត្ថកិច្ចកំពុងស្រាវជ្រាវបន្តទៀត ៕ ជ្រោយពេជ្រ
