សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្ដម៉ាកព្រូសមួយគ្រឿងបើកឆ្លងផ្លូវមិនប្រយ័ត្នត្រូវរថយន្ដម៉ាក ម៉ាស្ដារ មួយគ្រឿងទៀតបើកបុកចំក្បាលរថយន្ដផ្នែកខាងឆ្វេងបណ្ដាលឲ្យរងការខូចខាតទាំងសងខាង តែមិនបណ្ដាលឲ្យមានអ្នករងរបួសនោះទេ ។
ករណីគ្រោះថ្នាក់ចរាចរណ៍នេះបានកើតឡើងនៅវេលាម៉ោង២២និង៣០នាទីយប់ ថ្ងៃទី៣០ ខែសីហា ឆ្នាំ២០១៨ នៅចំណុចផ្លូវភ្លោះអូរឫស្សី កែងផ្លូវលេខ១០៧ ក្នុងសង្កាត់បឹងព្រលឹត ខណ្ឌ៧មករា រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញរថយន្ដម៉ាកព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2AB-0338 បើកបរដោយបុរសម្នាក់ និងរួមដំណើរដោយប្រពន្ធ កូន និងនារីម្នាក់ទៀត បានធ្វើដំណើរតាមបណ្ដោយផ្លូវលេខ១០៧ ទិសដៅពីត្បូងទៅជើង ឆ្លងកាត់ផ្លូវលេខ២១៤ ។
ប្រភពដដែលបានបន្តថា ពេលដែលរថយន្ដព្រូសកំពុងឆ្លងបានជិតពាក់កណ្ដាលផ្លូវ ក៏ត្រូវរថយន្ដម៉ាស្ដា ពណ៌ស ពាក់ស្លាកលេខ ភ្នំពេញ2AQ-9155 បើកបរដោយនារីជនជាតិចិន បានធ្វើដំណើរតាមបណ្ដោយផ្លូវលេខ២១៤ ហើយក៏បុកចំក្បាលរថយន្ដព្រូសបណ្ដាលឲ្យរថយន្ដទាំងពីរគៀបជាប់គ្នាខូចខាតទាំងសងខាង។
ក្រោយពីកើតហេតុ កម្លាំងសមត្ថកិច្ចមូលដ្ឋានបានចុះមកដល់កន្លែងកើតហេតុ និងធ្វើការសម្របសម្រួលភាគីទាំងសងខាង ដោយមិនចង់មានរឿងវែងឆ្ងាយ ភាគីខាងរថយន្ដម៉ាស្ដាដែលបើកបរដោយជនជាតិចិន បានព្រមសងថ្លៃការខូចខាតទៅឲ្យភាគីរថយន្ដព្រូសដើម្បីបញ្ចប់រឿងនៅនិងកន្លែងកើតហេតុតែម្ដង៕ ភារ៉ា ដង្កោ
