សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: យុវជន២នាក់ បើកម៉ូតូឌុបគ្នាចេញមកពីផឹកស៊ី ជាមួយមិត្តភក្តិ បម្រុងទៅផ្ទះវិញ ស្រាប់តែមានជនមិនស្គាល់មុខចំនួន២នាក់ ជិះម៉ូតូមកក្រោយធាក់ម៉ូតូជនរងគ្រោះបណ្តាលឲ្យដួលរងរបួសធ្ងន់ស្រាលទាំងពីរនាក់។
ហេតុការណ៍នេះបានកើតឡើង កាលពីម៉ោង១និង៣០នាទីរំលងអធ្រាត្រ ឈានចូលថ្ងៃទី២៨ ខែកញ្ញា ឆ្នាំ២០១៨ នៅតាមបណ្ដោយផ្លូវលេខ២៧១ ខាងត្បូងមន្ទីរពេទ្យព្រះកុសុម: ស្ថិតក្នុងសង្កាត់ទឹកថ្លា ខណ្ឌសែនសុខ។
បើតាមសម្តីពីជនរងគ្រោះជាអ្នកបើកបរម៉ូតូបានឲ្យដឹងថា មុនពេលកើតហេតុគាត់និងមិត្តភក្តិម្នាក់ទៀត បានបើកម៉ូតូមួយគ្រឿងម៉ាក ស៊ុយស៊ូគីនិច ពណ៌ខ្មៅ ពាក់ស្លាកលេខ ភ្នំពេញ 1GU-1326 ឌុបគ្នាទើបតែចេញពីកន្លែងផឹកស៊ីជាមួយមិត្តភក្តិនៅម្តុំផ្សារដីហុយ ហើយបម្រុងជិះត្រឡប់ទៅផ្ទះវិញ។ ដោយធ្វើដំណើរតាមបណ្ដោយផ្លូវលេខ២៧១ ក្នុងទិសដៅពីជើងទៅត្បូង ។ខណៈមកដល់ចំណុចកើតហេតុស្រាប់តែមានជនមិនស្គាល់មុខ២នាក់ជិះម៉ូតូមួយគ្រឿងមិនចាំម៉ាក មកពីក្រោយ បានលើកជើងធាក់ទៅលើម៉ូតូរបស់ពួកគាត់បណ្តាលដួលរងរបួសបាក់ដៃខាងឆ្វេង។ ចំណែកអ្នកអង្គុយក្រោយរងរបួសស្រាល រីឯជនជនបង្កក្រោយពេលធ្វើសកម្មភាពរួបានបន្ថែមល្បឿនជិះរត់គេចខ្លួនបាត់ស្រមោល។
បន្ទាប់ពីកើតហេតុយុវជនរងគ្រោះទាំង២ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅគ្លីនិកហុងហាក់។ ចំណែកម៉ូតូត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលទឹកថ្លារង់ចាំជនរងគ្រោះមកទទួលយកនៅពេលក្រោយ ៕ ជ្រោយពេជ្រ
