សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: នារីម្នាក់បើករថយន្តមួយគ្រឿង យ៉ាងលឿនបានជ្រុលចង្កូតទៅបុកម៉ូតូបើកឆ្លងផ្លូវ បណ្តាលឲ្យបុរសម្នាក់រងរបួសធ្ងន់ ហើយរថយន្តនៅមិនទាន់អស់ល្បឿនបានជ្រុលទៅឡើងលើខឿនបណ្តាលឲ្យបែកកង់ទៅមុខលែងរួច។
ហេតុការណ៍នេះបានកើតឡើងកាលពីម៉ោង១១យប់ ថ្ងៃទី៤ ខែតុលា ឆ្នាំ២០១៨ តាមបណ្ដោយផ្លូវសហព័ន្ធរុស្ស៊ី ខាងមុខមន្ទីរពេទ្យរ៉ូយ៉ាល់ភ្នំពេញ ស្ថិតក្នុងសង្កាត់ទឹកថ្លា ខណ្ឌសែនសុខ។
ប្រភពពត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់បើកបរម៉ូតូមួយគ្រឿងម៉ាក ធូដេ ពណ៌ស ពាក់ស្លាកលេខ ភ្នំពេញ1BZ-1127 ធ្វើដំណើរតាមបណ្ដោយផ្លូវសហព័ន្ធរុស្ស៊ី ក្នុងទិសដៅពីកើតទៅលិច ខណៈមកដល់ចំណុចកើតហេតុម៉ូតូបានបត់ឆ្វេងឆ្លងផ្លូវបំណងទៅផ្លូវ៥៥៥ ភ្លាមនោះស្រាប់តែមានរថយន្តមួយគ្រឿងម៉ាក អេះស្កាឡែត ពណ៌ខ្មៅ ពាក់ស្លាកលេខ ភ្នំពេញ 2I-0188 បើកបរដោយនារីម្នាក់និងបុរសម្នាក់ទៀតរួមដំណើរជាមួយ តាមបណ្ដោយផ្លូវសហព័ន្ធរុស្ស៊ី ក្នុងទិសដៅបញ្រ្ចាសទិសគ្នា និងក្នុងល្បឿនយ៉ាងលឿន បានជ្រុលទៅបុកម៉ូតូពេញទំហឹងបណ្តាលឲ្យម៉ូតូរងការខូចខាតដាច់ជា២។ រីឯអ្នកបើកបររងរបួសបាក់ជើងខាងស្តាំ ចំណែកឯរថយន្តនៅមិនទាន់អស់ល្បឿនបាមជ្រុលទៅឡើងលើខឿននៅមុខមន្ទីរពេទ្យរ៉ូយ៉ាល់បណ្តាលឲ្យបែកកង់ទៅមុខលែងរួច។
បន្ទាប់ពីកើតហេតុជនរងគ្រោះត្រូវបានរថយន្តសង្គ្រោះបន្ទាប់ដឹកយកទៅសង្គ្រោះនៅឯ គ្លីនិកពន្លឺ ចំណែកម៉ូតូនិងរថយន្តត្រូវបានសមត្ថកិច្ចជំនាញចុះមកវាស់វែងនិងយកទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយគ្នានៅពេលក្រោយ ៕ ជ្រោយពេជ្រ
