សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ ក្រោមការស្រាវជ្រាវបញ្ជាពីលោកឧត្តមសេនីយ៍ ទោបែន រ័ត្ន ស្នងការនគរបាលខេត្តត្បូងឃ្មុំ បានចេញបទបញ្ជាយ៉ាងម៉ឺងម៉ាត់ឲ្យការិយាល័យជំនាញបើកការស្រាវជ្រាវរហូតធ្វើការឃាត់ខ្លួនជនសង្ស័យជាឃាតក២នាក់ដែលបានសម្លាប់បុរសម្នាក់កាលពី៧ថ្ងៃមុនត្រង់ចំណុចឡូត៍កៅស៊ូ លេខ ៨១៧A។
សមត្ថកិច្ចឲ្យដឹងថា ជនសង្ស័យទាំង២នាក់ដែលត្រូវឃាត់ខ្លួន១.ឈ្មោះឡី ស្នែ ភេទប្រុស អាយុ ២៤ឆ្នាំ ជនជាតិខ្មែរឥស្លាម នៅភូមិវាលឃ្មុំ ឃុំគរ ស្រុកត្បូងឃ្មុំ ខេត្តត្បូងឃ្មុំ និងទី២.ឈ្មោះលី ម៉ាហុង ភេទប្រុសអាយុ ២៩ឆ្នាំជាតិខ្មែរឥស្លាមនៅភូមិវាលទឹកចេញ ឃុំគរ ស្រុកត្បូងឃ្មុំ ខេត្តត្បូងឃ្មុំ ។
ចំណែកជនរងគ្រោះឈ្មោះ ប៊ិន ម៉េងស៊ា ភេទ ប្រុស អាយុ៣៤ឆ្នាំ ជាតិខ្មែរនៅភូមិគោល ឃុំរកាពប្រាំ ស្រុកត្បូងឃ្មុំ ខេត្តត្បូងឃ្មុំ មុខរបរ ឆ្មាំការពារចំការកៅស៊ូ។
គួររំលឹកថា កាលពីយប់ថ្ងៃសៅរ៍ ១២រោច ខែភទ្របទឆ្នាំច សំរឹទ្ធិស័ក ព ស ២៥៦២ ត្រូវនឹងថ្ងៃទី៦ ខែតុលាឆ្នាំ២០១៨ វេលាម៉ោង២០និង ៣០នាទី មានកររណីឃាតកម្មមួយបានកើតឡើងត្រង់ចំណុចឡូត៍កៅស៊ូ លេខ ៨១៧ A.ស្ថិតនៅភូមិ៦.១៦ ឃុំគរ ស្រុកត្បូងឃ្មុំ ខេត្តត្បូងឃ្មុំ បង្កឡើងដោយជនសង្ស័យចំនួន២នាក់ខាងលើនេះ។
តាមដំណើរសាច់រឿងបានឲ្យដឹងថា មុនកើតហេតុជនរងគ្រោះបានជិះម៉ូតូពីផ្ទះបងប្អូនត្រលប់ទៅផ្ទះខ្លួនវិញ នៅតាមផ្លូវចំការកៅស៊ូក៏បានពើបប្រទះជនសង្ស័យចំនួន០២នាក់គួរឲ្យសង្ស័យក៏បានឈប់ម៉ូតូបំរុងចុះទៅសាកសួរក៏ត្រូវជនទាំងពីរខាងលើកាប់ និងអារកសំលាប់តែម្តង ។ ដោយបាត់ជនរងគ្រោះយូរពេក ប្រពន្ធក៏បានសាកសួរបងប្អូន និងនាំគ្នាដើររកក៏ប្រទះឃើញជនរងគ្រោះស្លាប់បាត់ទៅហើយ។
តាមចម្លើយសារភាពជនសង្ស័យបានឲ្យដឹងថា កាលពីថ្ងៃទី០៦ ខែតុលា ឆ្នាំ២០១៨ ខ្លួនទាំង០២នាក់បាននឹងកំពុងជក់ថ្នាំនៅផ្លូវចំការកៅស៊ូ ក៏បានលឺសំលេងម៉ូតូ រួចក៏ឃើញជនរងគ្រោះឈប់ម៉ូតូបម្រុងមកចាប់ខ្លួន ក៏សម្រេចចិត្តកាប់សម្លាប់តែម្តង។
ផ្អែកតាមចំលើយសារភាពខាងលើ សមត្ថកិច្ចជំនាញបានកសាងសំណុំរឿងបញ្ជូន ជនសង្ស័យខាងលើទៅអយ្យការអមសាលាដំបូង ដើម្បីចាត់ការតាមនីតិវិធីច្បាប់ ៕ វណ្ណៈ
