រថយន្ដបុកម៉ូតូសណ្ដោងរ៉ឺម៉កឆ្លងផ្លូវបណ្ដាលឲ្យរបួសធ្ងន់២នាក់

ខេត្តកណ្ដាលៈ រថយន្ដមួយគ្រឿងបើកដោយល្បឿនលឿនមិនប្រយ័ត្នត្រង់ចំណុចផ្លូវបំបែក បានបុកម៉ូតូសណ្ដោងរ៉ឺម៉កឆ្លងផ្លូវជិតផុត បណ្ដាលឲ្យបុរសម្នាក់ជាអ្នកបើកបរម៉ូតូនិងអ្នករួមដំណើរទទួលរងរបួសធ្ងន់ ។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១៣និង៥០នាទី ថ្ងៃទី១៦ ខែតុលា ឆ្នាំ២០១៨ លើផ្លូវជាតិលេខ៦ ចន្លោះគីឡូមែត្រលេខ៣៦-៣៧ ស្ថិតក្នុងភូមិស្វាយជ្រុំ ឃុំព្រែកដំបង ស្រុកមុខកំពូល ខេត្តកណ្តាល ។

មន្រ្ដីនគរបាលចរាចរណ៍ស្រុកមុខកំពូលបានឲ្យដឹងថា ជនរងគ្រោះរងរបួសធ្ងន់ឈ្មោះ ថន ធួន ភេទប្រុស អាយុ៥១ឆ្នាំ មានទីលំនៅភូមិល្វាក្រោម ឃុំស្ដៅ ស្រុកកងមាស ខេត្តកំពង់ចាម បើកម៉ូតូម៉ាកហុងដាC១២៥ ពណ៌ខ្មៅ ពាក់ស្លាកលេខ ភ្នំពេញ 1FQ-9045 មានរួមដំណើរម្នាក់ឈ្មោះ ធួន ច័ន្ទរតនា ភេទស្រី អាយុ២៣ឆ្នាំ មានទីលំនៅជាមួយគ្នា (រងរបួសធ្ងន់) ។ ចំណែករថយន្ដម៉ាកតូយ៉ូតា HIACE ពណ៌ទឹកប្រាក់ ពាក់ស្លាកលេខ AT18 2.0212 បើកបរដោយជនមិនស្គាល់អត្ដសញ្ញាណរត់គេចខ្លួនបាត់ស្រមោល ។

ប្រភពដដែលបន្ដថា នៅមុនពេលកើតហេតុ សាក្សីបានឃើញជនរងគ្រោះជាអ្នកបើកម៉ូតូសណ្ដោងរ៉ឺម៉កខាងលើ ធ្វើដំណើរតាមបណ្ដផ្លូវជាតិលេខ៦ លុះមកដល់ចំណុចកើតហេតុត្រង់ចំណុចផ្លូវបំបែកអ្នកបើកបរម៉ូតូសណ្ដោងរ៉ឺម៉កបានបត់ឆ្លងផ្លូវក្នុងទិសដៅពីកើតទៅលិច លុះឆ្លងផ្លូវជិតផុតក៏ស្រាប់រថយន្ដខាងលើ បានធ្វើដំណើរក្នុងទិសដៅពីត្បូងទៅជើង ដោយល្បឿនលឿន បានជ្រុលមកបុកម៉ូតូសណ្ដោងរ៉ឺម៉កជនរងគ្រោះពេញមួយទំហឹង បណ្ដាលឲ្យជនរងគ្រោះទទជាអ្នកបើកបរម៉ូតូសណ្ដោងរ៉ឺម៉កនិងអ្នករួមដំណើរទទួលរងរបួសធ្ងន់ រីឯអ្នកបើកបររថយន្ដបានទុករថយន្ដចោលរួចរត់គេចខ្លួនបាត់ស្រមោល ។

ក្រោយពីមានហេតុការណ៍កើតឡើង ជនរងគ្រោះទាំង២នាក់ត្រូវបានរថយន្ដសាមុយដឹកបញ្ជូនទៅសង្រ្គោះនៅមន្ទីរពេទ្យ ចំណែកមធ្យោបាយពាក់ព័ន្ធទាំង២គ្រឿងត្រូវបានសមត្ថកិច្ចចុះវាស់វែង និងដកហូតយកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ ៕ ស្អាងជ័យ