សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ មានសេចក្តីរាយការណ៍ថា បទល្មើសនេសាទបានកើតឡើងនៅតំបន់ព្រៃរនាម មាត់បឹងទន្លេសាប នៅតំបន់សហគមន៍ស្រីចឹក ស្ថិតក្នុងស្រុកកណ្តៀង ខេត្តពោធិ៍សាត់ ។ សេចក្តីរាយការណ៍នេះ ញាំងឲ្យមានការរិះគន់ថា ប្រធានសហគមន៍នេសាទស្រីចឹក លោក ឌុក សុខា ពាក់ព័ន្ធនឹងបទល្មើសនេសាទនេះ ។ ប៉ុន្តែលោកឌុក សុខា អះអាងថា សហគមន៍នេសាទគ្មានសិទ្ធិបង្ក្រាបបទល្មើសទេ ពោលគឺមានសិទ្ធិត្រឹមរាយការណ៍ឲ្យស្ថាប័នជំនាញគឺរដ្ឋបាលជលផលចុះបង្ក្រាប ហើយបើគេ(ជលផល) ហៅចូលរួមបង្ក្រាប ទើបអាចចូលរួមបាន ។
បណ្តាញផ្សព្វផ្សាយនានាបានរិះគន់លោកឌុក សុខា ថា បានបណ្តែតបណ្តោយ និងឃុបឃិតឲ្យមានបទល្មើសនេសាទ នៅភូមិព្រែកត្របែក ឃុំកញ្ជរ ស្រុកកណ្តៀង ខេត្តពោធិ៍សាត់ តាមរយៈការបង្កើតឲ្យមាន«ប» រាប់ពាន់គីឡូម៉ែត្រ ពីបណ្តាអ្នកនេសាទមកពីស្រុកជីក្រែង ខេត្តសៀមរាប ។ ប៉ុន្តែប្រជាសហគមន៍តំបន់ស្រីចឹក ស្ថិតក្នុងឃុំកញ្ជរ ស្រុកកណ្តៀង ខេត្តពោធិ៍សាត់ ប្រមាណជិត១០០មេដៃ បានផ្តិតមេដៃប្រឆាំងចំពោះការចោទប្រកាន់មកលើលោក ឌុក សុខា នោះ ។ ប្រជាពលរដ្ឋនៅតំបន់សហគមន៍ស្រីចឹក អះអាងថា លោកឌុក សុខា មិនពាក់ព័ន្ធនឹងបទល្មើសនេសាទនេះទេ ពីព្រោះ សហគមន៍គ្មានសិទ្ធិអំណាចអ្វីក្នុងការអនុញ្ញាតឲ្យមានបទល្មើសនោះឡើយ ។
តំណាងប្រជា សហគមន៍នេសាទស្រីចិកមួយរូបនិយាយថា ពួកគាត់មានសិទ្ធិ នេសាទជាលក្ខណៈគ្រួសារ ដើម្បីបានត្រី គ្រាន់ចិញ្ចឹមជីវិត ។ ចំពោះការចោទប្រកាន់ អំពីបញ្ហាបទល្មើសនេសាទ បច្ចុប្បន្ននេះ នៅលើផ្ទៃបឹងទន្លេសាប កន្លែងណាក៏មាន បទល្មើសនេសាទដែរ ។ រីឯតួនាទីក្នុងការ បង្ក្រាបបទល្មើស គឺសមត្ថកិច្ចរដ្ឋបាលជល ផលឯណោះទេ ។ ប្រសិនបើសមត្ថកិច្ចជល ផលរកកិច្ចសហការជាមួយសហគមន៍ ដើម្បីបង្ក្រាបបទល្មើស នោះទើបប្រជា នេសាទអាចចូលរួមបាន ។
តំណាងប្រជាពលរដ្ឋនិយាយថា លោក ឌុក សុខា មិនបានប្រព្រឹត្តនិងជាប់ពាក់ព័ន្ធ ចំពោះបញ្ហាបទល្មើសនេសាទនោះឡើយ ។ ផ្ទុយទៅវិញ លោកបានប្រឹងប្រែងការពារ ថែរក្សាធនធានធម្មជាតិ ដែលមាននៅក្នុង សហគមន៍បានយ៉ាងល្អទៀតផង ។ នៅក្នុងនោះការថែរក្សាការពារទីកន្លែងអភិរក្ស (ព្រែកតាចាន់) ក៏បានល្អនៅសល់ពូជត្រី យ៉ាងច្រើនរាប់តោន កើនមួយឆ្នាំទៅមួយ ឆ្នាំ ។ ដូច្នេះការចោទប្រកាន់ទាំងឡាយ គ្មានមូលដ្ឋានច្បាស់លាស់ទេ ។
បណ្តាញផ្សព្វផ្សាយដូចជាគេហទំព័រ និងហ្វេសប៊ុកមួយចំនួនបានវាយប្រហារដោយគ្មានមូលដ្ឋានច្បាស់លាស់ និងវិជ្ជាជីវៈ ទៅលើលោក ឌុក សុខា ថាបណ្តែតបណ្តោយ និងឃុបឃិតឲ្យមានបទល្មើសនេសាទនៅក្នុងសហគមន៍របស់ខ្លួន ។ ប៉ុន្តែប្រជាពលរដ្ឋបានបដិសេធន៍ចំពោះការលើកឡើងទាំងនោះ ពីព្រោះសហគមន៍គ្មានសិទ្ធិអំណាចអ្វីនៅពីលើរដ្ឋបាលជលផល ដែលជាសមត្ថកិច្ចរបស់រដ្ឋនោះទេ ។ សហគមន៍មានតួនាទីត្រឹមតែអប់រំ ណែនាំប្រជាពលរដ្ឋ ឲ្យយល់ដឹងពីសារសំខាន់ នៃធនធានធម្មជាតិ ជាពិសេសរួមគ្នាថែរក្សា ពូជត្រីដ៏មានសារសំខាន់តែប៉ុណ្ណោះ ។ ប្រជាពលរដ្ឋសហគមន៍នេសាទស្រីចឹកអះអាងថា ការចោទប្រកាន់ទាំងឡាយគ្មានមូលដ្ឋាន និងមិនយល់អំពីច្បាប់ទម្លាប់ ៕ ប៉ឹម ពិន
