សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រយ៉ែឡានចូលចតដើម្បីចុះចូលហាងស្រាប់តែច្រឡំជាន់ហ្គាស្មានតែហ្វ្រាំង បានជ្រុលល្បឿនបុកទម្លោះចូលហាងលក់នាឡិចកា យីហោ អឺរ៉ុប -ស៊ី្វស ដែលមានទីតាំងស្ថិតតាមបណ្តោយមហាវិថីព្រះមុនីវង្សសង្កាត់មនោរម្យ ខណ្ឌ៧មករា រាជធានីភ្នំពេញ ដោយបង្កការភ្ញាក់ផ្អើលនារសៀលថ្ងៃទី ២៨ ខែ តុលា ឆ្នាំ ២០១៨ ។
តាមប្រភព័ត៌មានពីបុគ្គលិកបម្រើការក្នុងហាងលក់នាឡិកា បានអោយដឹងថាមុនពេលកើតហេតុមានបុរសម្នាក់បានបើករថយន្តមួយគ្រឿងម៉ាករេហ្វ័រ ពណ៌ទឹកប្រាក់ ធ្វើដំណើរតាមបណ្តោយមហាវិថីព្រះមុនីវង្សទិសដៅពីជើងទៅត្បូង ខណៈមកដល់ចំណុចកើតហេតុរថយន្តខាងបានទាញចង្កូតបត់ស្តាំដៃចូលចតនៅមុខហាងនាឡិកា ប៉ុន្តែទំនងបុរសដែលជាតៃកុងច្រឡំជាន់ហ្គាស្មានតែហ្វ្រាំងក៏ជ្រុលល្បឿនបុកទ្វារកញ្ជក់បាក់អស់២ផ្ទាំងហើយជ្រុលបុកទូរដាក់តាំងនាឡិកាមួយទូរនឹងកិនពីលើនាឡិកាទំនើបៗខ្ទេចអស់ជាង២០គ្រឿង ចំណែករថយន្តត្រូវទ្វារកញ្ជាក់ធ្លាក់សង្កត់ពីលើរងការខូចខាតមួយផ្នែកផងដែរ ប៉ុន្តែសំណាងល្អក្នុងហេតុការណ៍នេះមិនបណ្តាលអោយមនុស្សណាម្នាក់រងរបួសនោះទេ ។
ក្រោយមានហេតុការណ៍នេះសមត្ថកិច្ចមូលដ្ឋានបានចុះដល់កន្លែងកើតហេតុនឹងបានទំនាកទំនងទៅសមត្ថកិច្ចជំនាញចុះវាស់វែងនឹងអូសយករថយន្តបង្កទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយនៅពេលក្រោយ។ សមត្ថកិច្ចបញ្ជាក់ថាក្រោយកើតហេតុភ្លាមៗម្ចាស់រថយន្តសុំសម្រួលសងថ្លៃខូចខាតដែលប៉ុន្មាន ម្ចាស់ហាងលក់នាឡិកាមិនព្រមនោះទេ ដោយអះអាងថាទ្រព្យសម្បត្តិរបស់ខ្លួនដែលខូចខាតមានចំនួនច្រើន ៕ ភារ៉ា ដង្កោ
