សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ វាជារឿងដល់សាហាវបំផុតខណៈ ដែលក្រុមចោរឆក់មានគ្នា៤នាក់ ជិះម៉ូតូ២គ្រឿងមកធ្វើសកម្មភាពឆក់កាបូបប្តី ប្រពន្ធ២នាក់ កំពុងតែជិះម៉ូតូមួយគ្រឿង ដឹកគ្នាទៅលក់ផ្កា មុខព្រះបរមរាជវាំង ខណៈជិះបានពាក់កណ្តាលផ្លូវ ក៏លេចមុខជនសង្ស័យ មកធ្វើសកម្មភាពឆក់កាបូបស្រ្តីរងគ្រោះដាក់ជាប់នឹងចង្កេះបានសម្រេច ហើយជិះរត់គេចខ្លួន ភ្លាមនោះជនរងគ្រោះទាំង២នាក់បានជិះដេញតាមជនសង្ស័យ ក៏ត្រូវបក្ខពួក ជនសង្ស័យ២នាក់ទៀត ដែលជាអ្នកបិទគូថជិះម៉ូតូមកពីក្រោយ រួចធាក់ដៃចង្កូតម៉ូតូជនរងគ្រោះ ធ្វើឲ្យរេចង្កូតដួលបោកផ្ទប់ នឹងផើងផ្កា បណ្តាលបុរសជាប្តីបែកក្បាលស្លាប់ភ្លាមៗនៅកន្លែងកើតហេតុ រីឯប្រពន្ធរងរបួសគួរសម ។
ករណីខាងលើនេះ បានកើតឡើងកាលពីវេលាម៉ោង៦ ព្រឹក ថ្ងៃទី៣ ខែវិច្ឆិកា ឆ្នាំ២០១៨ នៅចំណុចផ្លូវលេខ២៩៤ កែងនឹងផ្លូវព្រះនរោត្តម សង្កាត់បឹងកេងកង១ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានឲ្យដឹងថា ជនរងគ្រោះជាប្តីដែលបានស្លាប់នោះឈ្មោះ ចយ អាង អាយុ ៣៦ មុខរបរលក់ផ្កា និងមានប្រពន្ធឈ្មោះសឿន ស៊ីម អាយុ៣៣ ឆ្នាំ មុខរបរលក់ផ្កា នៅមុខព្រះបរមរាជវាំង អ្នកទាំងពីរ ស្នាក់នៅផ្ទះជួល សង្កាត់ផ្សារដើមថ្កូវ ខណ្ឌចំការមន មានស្រុកកំណើត នៅភូមិជ្រៃ ឃុំរាប ស្រុកពាមរាំង ខេត្តព្រៃវែង ជិះម៉ូតូមួយគ្រឿង ម៉ាកហុងដាឌ្រីម សេ១២៥ ស៊េរី ឆ្នាំ២០១២ ពណ៌ខ្មៅ ពាក់ស្លាកលេខ ភ្នំពេញ 1BF-4859 ។
ក្រោយកើតហេតុ ជនរងគ្រោះជាប្រពន្ធ ត្រូវបានសមត្ថកិច្ចនាំយកមកសាកសួរ នឹងដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលបឹងកេងកងទី១ ខណ្ឌចំការមន ដើម្បីកំណត់មុខសញ្ញាជនសង្ស័យទាំងនោះ នឹងស្វែងរកចាប់ខ្លួនយកមកដាក់ទោសតាមច្បាប់ ។ ចំណែកសពបុរសជាប្តី ត្រូវសមត្ថកិច្ចធ្វើកំណត់ហេតុរួចប្រគល់ឲ្យទៅសាច់ញាតិ ដឹកយកទៅធ្វើបុណ្យនៅឯស្រុកកំណើតតាមប្រពៃណី ៕ស រស្មី
