បុរសជនជាតិចិន៣នាក់ ស្រវឹងស្រាបើករថយន្តបុកក្បាលនាគពុះចែកទ្រូងផ្លូវបាក់មួយកង់

ភ្នំពេញ៖ បុរសជនជាតិចិន៣នាក់ ស្រវឹងស្រាបើករថយន្តលុចស៊ីសមួយគ្រឿងជ្រុលចង្កូតទៅ បុកក្បាលនាគពុះចែកទ្រូងផ្លូវ បាក់អស់មួយកង់ រថយន្តបង្កបែកកង់ខាងមុខទៅលែងរួច ។

ហេតុការណ៍នេះ កើតឡើងកាលពីវេលាម៉ោង២រំលងអធ្រាត្រ ឈានចូលថ្ងៃទី២៦ ខែវិច្ឆិកា ឆ្នាំ២០១៨ ស្ថិតនៅចំណុចមុខផ្សារទួលគោក តាមបណ្តោយផ្លូវ២៨៩ ក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុ គេឃើញបុរសជនជាត់ចិន៣នាក់ ស្រវឹងស្រា បើករថយន្តឡិចស៊ីស RX300 ពណ៌ខ្មៅ ពាក់ស្លាកលេខ ភ្នំពេញ 2P-8819 ធ្វើដំណើរទិសដៅពីជើងទៅត្បូង លុះមកដល់ចំណុចកើតហេតុខាងលើ បានរេចង្កូតទៅបុកក្បាលនាគ ពុះចែកផ្លូវ បណ្តាលឲ្យបាក់ដួលមួយកង់ខ្ទាតចេញពីជួរប្រមាណជា២ម៉ែត្រ ចំណែករថយន្តបង្ក បែកកង់ខាងមុខខាងឆ្វេងយ៉ាងដំណំទៅមុខលេរួច ។

ក្រោយកើតហេតុ សមត្ថកិច្ចមូលដ្ឋាន និងជំនាញបានចុះមកដល់វាស់វែង យករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក រាជធានីភ្នំពេញរង់ចាំដោះស្រាយគ្នាទៅតាមផ្លូវច្បាប់ ៕ ភារ៉ា ដង្កោ