សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានហេតុការណ៍ដ៏ភ្ញាក់ផ្អើលមួយ បន្ទាប់ពីក្រុមអ្នកសារព័ត៌មានចុះទៅផ្តិតយករូបភាព ករណីគ្រោះថ្នាក់ចរាចរណ៍រវាងរថយន្តឡិចស៊ីស បុកជាមួយរថយន្តកូរ៉ូឡា បណ្ដាលឲ្យរងការខូចខាត ហើយម្ចាស់រថយន្តកូរ៉ូឡា ហាមមិនឲ្យអ្នកព័ត៌មានថត និងរករឿងអ្នកព័ត៌មានផ្អើលពេញផ្លូវ ។
ហេតុការណ៍នេះដែរ បានកើតឡើងនៅវេលាម៉ោង១១ និង២០នាទីយប់ ថ្ងៃទី២៥ ខែវិច្ឆិកា ឆ្នាំ២០១៨ នៅតាមបណ្ដោយផ្លូវលេខ៣៦០ កែងផ្លូវលេខ១៤៣ ក្នុងសង្កាត់បឹងកេងកង៣ ខណ្ឌចំការមន រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញមានរថយន្តរងគ្រោះម៉ាក កូរ៉ូឡា ពណ៌ស្ក ពាក់ស្លាកលេខភ្នំពេញ 2C-8663 បើកបរដោយបុរសម្នាក់បានធ្វើដំណើរតាមបណ្ដោយផ្លូវ៣៦០ ទិសដៅពីលិចមកកើតក្នុងល្បឿនល្មម ខណៈមកដល់ផ្លូវបែកជាបួន កែងផ្លូវលេខ១៤៣ ស្រាប់តែមានរថយន្តបង្កម៉ាក ឡិចស៊ីស RX300 ពណ៌ស ពាក់ស្លាកលេខ ភ្នំពេញ 2AF- 1115 បានធ្វើដំណើរតាមបណ្ដោយផ្លូវ១៤៣ ទិសដៅពីជើងទៅត្បូងក្នុងល្បឿនលឿន ហើយមិនប្រ័យត្ន និងចាប់ហ្វ្រាំងមិនទាន់ ក៏បុករថយន្តកូរ៉ូឡាចំពីចំហៀងពេញទំហឹង បណ្ដាលឲ្យរងការខូចខាតយ៉ាងដំណំ រីឯរថយន្តបង្ករងការខូចខាតពីមុខតិចតួច តែមិនបង្កឲ្យមនុស្សរងរបួសនោះឡើយ ។
ក្រោយកើតហេតុ ភាគីរថយន្តបង្កម៉ាកឡិចស៊ីស RX300 ព្រមសងថ្លៃខូចខាតទៅលើរថយន្តរងគ្រោះម៉ាកកូរ៉ូឡា ចំនួន១ពាន់ដុល្លារដើម្បីបញ្ចប់រឿង ហើយក្នុងអំឡុងពេលភាគីបង្ក និងភាគីរងគ្រោះកំពុងសម្រួលដោះស្រាយគ្នា ក៏មានក្រុមអ្នកសារព័ត៌មានចុះទៅផ្តិតយករូបភាព តែត្រូវបានភាគីរងគ្រោះហាមមិនឲ្យថត និងឈ្លោះជាមួយអ្នកសារព័ត៌មានថែមទៀត ដោយចោទប្រកាន់ថា មកពីក្រុមអ្នកសារព័ត៌មានថតរូបគាត់ ទើបធ្វើឲ្យរូបគាត់ បាត់បង់ការងារ ៕ ភារ៉ា ដង្កោ
