សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មុខសញ្ញាលួចម៉ូតូ និងប្រើប្រាស់ថ្នាំញៀនម្នាក់ត្រូវបានកម្លាំងនគរបាលប៉ុស្តិ៍ច្បារអំពៅទី២ ចាប់ខ្លួនរួមជាមួយវត្ថុតាងម៉ូតូ១គ្រឿង ដែលជនសង្ស័យបណ្តើរចេញពីមុខផ្ទះរបស់ជនរងគ្រោះបំរុងជិះគេចខ្លួន តែជនរងគ្រោះឃើញទាន់ស្រែកចោរ ចោរ ក៏ត្រូវសមត្ថកិច្ចចុះល្បាតចេញអន្តរាគមន៍ចាប់ខ្លួនបានតែម្តងកាលពីវេលាម៉ោង៣,៣០នាទីរសៀល ថ្ងៃទី២៥ ខែវិច្ឆិកា ឆ្នាំ២០១៨ នៅចំនុចមុខផ្ទះគ្មានលេខ ផ្លូវបេតុង ភូមិដើមស្លែង សង្កាត់ច្បារអំពៅទី២ ខណ្ឌច្បារអំពៅ ។
ជនសង្ស័យឈ្មោះតាំង សុធា ភេទប្រុស អាយុ២៤ឆ្នាំ ជនជាតិវៀតណាម មុខរបរមិនពិតប្រាកដ ស្នាក់នៅផ្ទះជួល ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ ។
ជនរងគ្រោះឈ្មោះកែម រ៉ានី ភេទ ប្រុស អាយុ៣៩ឆ្នាំ ជនជាតិខ្មែរ មុខរបរនៅផ្ទះ ស្នាក់នៅផ្ទះកើតហេតុខាងលើ ។
មន្ត្រីនគរបាលមូលដ្ឋានបានឲ្យដឹងថា មុនពេលកើតហេតុជនរងគ្រោះទុកម៉ូតូម៉ាកHonda Scopy-SO ពណ៌លឿងលាយស ស្លាកលេខ ភ្នំពេញ ១BC-៥៣២៥ នៅមុខផ្ទះរបស់ខ្លួន ដោយទុកកូនសោនៅជាប់នឹងម៉ូតូ រួចក៏ចូលទៅក្នុងផ្ទះ ស្រាប់តែជនសង្ស័យធ្វើសកម្មភាពលួចម៉ូតូ ជនរងគ្រោះបណ្តើរចេញបានបន្តិច ក៏ត្រូវបានជនរងគ្រោះឃើញស្រែកចោរៗ ស្របពេលនោះកម្លាំងនគរបាលប៉ុស្តិ៍ ដែលចុះល្បាតក្នុងមូលដ្ឋានបានឮសម្លេងជនរងគ្រោះស្រែក ក្បែរជួយអន្តរាគមន៍ឃាត់ខ្លួនជនសង្ស័យ រួម និងវត្ថុតាងម៉ូតូ០១គ្រឿងម៉ាកខាងលើ ជារបស់ជនរងគ្រោះ រួចបញ្ជូនមកអធិការដ្ឋាននគរបាលខណ្ឌច្បារអំពៅ ចាត់ការតាមច្បាប់ ។
បច្ចុប្បន្នជនសង្ស័យត្រូវបានឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌច្បារអំពៅដើម្បីកសាងសំណុំរឿងបញ្ជូនទៅតុលាការ ៕ សណ្តោស
