សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តព្រូសមួយគ្រឿងបើកឆ្លងផ្លូវមិនប្រយ័ត្នត្រូវរថយន្តហាយឡែនឌ័រ កំពុងបើកលឿនជ្រុលបុកគូទពេញទំហឹង កាលពីវេលាម៉ោង១១នឹង០០នាទី ព្រឹកថ្ងៃទី២៦ ខែវិច្ឆិកា ឆ្នាំ ២០១៨ ស្ថិតតាមបណ្តោយផ្លូវ២១៧ មុខវត្តជើងឯក សង្កាត់ដង្កោ ខណ្ឌដង្កោ រាជធានីភ្នំពេញ ។
តាមប្រភពព័ត៌មានកន្លែងកើតហេតុបានអោយដឹងថាដំបូងគេឃើញរថយន្តម៉ាកព្រូស ពណ៌ស មួយគ្រឿង ធ្វើដំណើរយ៉ាងតាមបណ្តោយផ្លូវ២១៧ ទិសដៅឆ្ពោះពីរង្វង់ដីក្រហមឡើងមកកន្លែងឆៀករថយន្ត ខណៈបើកមកដល់ចំណុចកើតហេតុក៏បានបួងចង្កូតបត់ឆ្វេងដៃឆ្លងផ្លូវយ៉ាងលឿនស្របពេលមានរថយន្តហាយឡែនឌ័រមួយគ្រឿងទៀតកំពុងបើកបរក្នុងល្បឿនយ៉ាងលឿនទិសដៅពីជើងទៅត្បូង ដោយជាន់ហ្វ្រាំងមិនទាន់ ក៏ជ្រុលបុកចំគូទរថយន្តព្រូសពេញទំហឹង បណ្តាលអោយរថយន្តព្រូសខ្ទេចមួយកំណាត់ក្រោយ ចំណែករថយន្តហាយឡែនក៏រងការខូចខាតផ្នែកខាងមុខផងដែរ ប៉ុន្តែសំណាងក្នុងហេតុការណ៍នេះមិនបណ្តាលអោយមានមនុស្សរង់របួសនោះទេ ។
ក្រោយកើតហេតុដោយសារភាគីទាំងសងខាងជជែកយកត្រូវរៀងខ្លួន ទើបសមត្ថកិច្ចមូលដ្ឋានសហការជាមួយសមត្ថកិច្ចជំនាញសម្រេចធ្វើការវាស់វែង អូសយករថយន្តទាំង២គ្រឿង យកមករក្សាទុកនៅអធិការដ្ឋាននគរបាលខណ្ឌដង្កោបណ្តោះអាសន្ន សិនរង់ចាំដោះស្រាយគ្នានាពេលក្រោយ៕ ភារ៉ា ដង្កោ
