សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អាជ្ញាធររាជធានីភ្នំពេញ បានរៀបចំ វាយគង ទូងស្គរ ដើម្បីអបអរសាទរការដាក់ល្ខោនខោល ជាសម្បត្តិបេតិកភណ្ឌ អរូបី នៃមនុស្សជាតិ របស់អង្គការយូណេស្កូពិភពលោក។ ពិធីអបអរសាទរនេះ ដោយមានការចូលរួមពី លោកឃួង ស្រេង អភិបាលរាជធានី និង លោកម៉ប់ សារិន ប្រធានក្រុមប្រឹក្សារាជធានី និងមន្ត្រីរាជការចំណុះឲ្យរដ្ឋបាលរាជធានី កាលពីរាត្រីថ្ងៃសុក្រ ៨រោចខែកត្ដិក ឆ្នាំចសំរឹទ្ធិស័កព.ស២៥៦២ត្រូវនិងថ្ងៃទី៣០វិច្ឆិកា ឆ្នាំ២០១៨។
ក្នុងឱកាសនោះលោក ឃួង ស្រេង អភិបាលរាជធានីភ្នំពេញ បានបញ្ជាក់ថា៖ ល្ខោនខោល ពិតជាសម្បត្ដិវប្បធម៏របស់ខ្មែរ និងជាមោទនភាពជាតិខ្មែរ វប្បធម៌អរូបីរបស់ខ្មែរ ត្រូវបានដាក់បញ្ចូលជាសម្បត្តិបេតិកភណ្ឌអរូបីសម្រាប់មនុស្សជាតិទូទៅ ត្រូវបាន អង្គការយូណេស្កូ ចាត់ទុកជាសម្បត្ដិវប្បធម៏របស់ខ្មែរ ។ សូមអបអរសាទរ “ល្ខោនខោល” ត្រូវបានដាក់បញ្ចូលជាសម្បត្តិបេតិកភណ្ឌអរូបីសម្រាប់មនុស្សជាតិទូទាំងពិភពលោក។ នៅវេលាម៉ោង១០យប់ ថ្ងៃទី៣០ ខែវិច្ឆិកា ឆ្នាំ២០១៨នេះ ស្នូរវាយគង ទូងស្គ ទះប៉ោត និងគោះត្រដោក បានបន្លឺឡើងនៅគ្រប់ទីកន្លែង ក្នុងប្រទេសកម្ពុជា ដើម្បីអបអរសាទរព្រឹត្តិការណ៍ ជាប្រវត្តិសាស្ត្រនៃការដាក់បញ្ចូល ល្ខោនខោល ចូលក្នុងបញ្ជីបេតិកភ័ណ្ឌ អរូបីយនៃមនុស្សជាតិ របស់អង្គការយូណេស្កូ។
ល្ខោនខោល ដែលជាស្នាដៃសិល្បៈបុរាណដ៏វិសេសវិសាលអស្ចារ្យរបស់កម្ពុជា ត្រូវបានអង្គការយូណេស្កូសម្រេចដាក់ចូលក្នុងបញ្ជី បេតិកភ័ណ្ឌពិភពអរូបីយនៃមនុស្សជាតិ ក្នុងឱកាសកិច្ចប្រជុំលើកទី១៣ ក្នុងទីក្រុងព័រល្វីស នៃសាធារណរដ្ឋម៉ូរីស នៅថ្ងៃទី២៨ ខែវិច្ឆិកា ឆ្នាំ២០១៨នេះ។
សម្តេចនាយករដ្ឋមន្ត្រី បានចាត់ទុល្ខោនខោល ជាសម្បត្តិបេតិកភណ្ឌអរូបី នៃមនុស្សជាតិ សមិទ្ធផលនេះ គឺជាមោទនភាពថ្មីមួយទៀត សម្រាប់ប្រជាពលរដ្ឋ និងប្រទេសកម្ពុជា។ សម្តេចតេជោប្រមុខរាជរដ្ឋាភិបាល បានលើកឡើងថា សមិទ្ធផលនេះ គឺជាលទ្ធផលនៃកិច្ចប្រឹងប្រែងដ៏យូរអង្វែង និងការពុះពារយ៉ាងសកម្មរបស់រាជរដ្ឋាភិបាលកម្ពុជា ដឹកនាំដោយគណបក្សប្រជាជនកម្ពុជា និងការគាំទ្រយ៉ាងផុលផុសពីសិល្បៈករ អង្គការ សមាគមន៍ សង្គមស៊ីវិល ដែលធ្វើការក្នុងវិស័យសិល្បៈវប្បធម៌ និងការគាំទ្រលើកទឹកចិត្តពីមហាជនទូទៅ និងប្រជាជនកម្ពុជាទាំងមូល។ សម្តេចនាយករដ្ឋមន្ត្រី បានបន្ថែមថា ការដាក់បញ្ចូល ល្ខោនខោល ទៅក្នុងបញ្ជីអរូបីយនៃមនុស្សជាតិនាពេលនេះ គឺជាការរួមចំណែកធ្វើឲ្យកេរ្តិ៍ឈ្មោះរបស់ព្រះរាជាណាចក្រកម្ពុជា កាន់តែល្បីសុះសាយទូទាំងពិភពលោក ហើយធ្វើឲ្យកម្ពុជាក្លាយជាតួអង្គកាន់តែលេចធ្លោរថែមទៀត នៅលើវេទិកាបេតិកភ័ណ្ឌពិភពលោក៕ សំរិត
