សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ កម្លាំងសហការនៃអធិការដ្ឋាននគរបាល មូលដ្ឋានកងរាជអាវុធហត្ថស្រុកវាលវែងឃាត់ខ្លួនជនសង្ស័យចំនួន ២នាក់ ជាប់ពាក់ព័ន្ធក្នុងករណីចោរកម្ម ក្នុងនោះកម្លាំងក៏បានដកហូតនូវវត្ថុតាងមួយចំនួន រួមទាំងសម្ភារៈ ឧបករណ៍ផ្សេងៗផងដែរ ។
ប្រតិបត្តិការខាងលើធ្វើឡើងនៅវេលាម៉ោង១១ និង០៥នាទី ព្រឹកថ្ងៃទី៤ ខែធ្នូ ឆ្នាំ២០១៨ ត្រង់ចំណុចអូរដំណាក់កន្សែង ស្ថិតក្នុងភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ ។
ប្រភពព័ត៌មានពីកម្លាំងចុះប្រតិបត្តិការខាងលើបានឲ្យដឹងថា ជនសង្ស័យបានឃាត់ខ្លួនទី១ ឈ្មោះ ឡៃ ម៉ានស្លេះ ភេទប្រុស អាយុ ២០ឆ្នាំ និងទី១ ឈ្មោះ សុខរតនា ភេទប្រុស អាយុ ២៨ឆ្នាំ បច្ចុប្បន្ន អ្នកទាំងពីរស់នៅភូមិបោះពួយ ឃុំលាច ស្រុកភ្នំក្រវាញ ខេត្តពោធិ៍សាត់ ។
ប្រភពព័ត៌មានខាងលើបន្តថា ក្នុងកិច្ចប្រតិបត្តិការឃាត់ខ្លួនជនសង្ស័យកម្លាំងដកហូតនូវវត្ថតាង និងសម្ភារៈរួមមាន អាគុយចំនួន ២គ្រាប់ ពូថៅចំនួន ២ ឧបករណ៍ឆក់ត្រី ១គ្រឿង ឧបករណ៍សង្ស័យសម្រាប់កាច់សោករម៉ូតូចំនួន ១ឈុត និងម៉ូតូចំនួន ១គ្រឿងម៉ាក ហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1A 6397 ។
ប្រភពដដែលបន្តទៀតថា ចំពោះជនសង្ស័យទាំង ២នាក់ ជាប់ពាក់ព័ន្ធករណីចោរកម្ម រួមទាំងវត្ថុតាង ឧបករណ៍ សម្ភារៈ បាននាំយកទៅបន្តនីតិវិធីនៅមូលដ្ឋានកងរាជអាវុធហត្ថស្រុកវាលវែង ដើម្បីបំពេញសំណុំឯកសារពាក់ព័ន្ធបញ្ជូនបន្ត ទៅការិយាល័យជំនាញព្រហ្មទណ្ឌ នៃបញ្ជាការដ្ឋានកងរាជអាវុធខេត្តពោធិ៍សាត់ចាត់ការបន្ត៕ ប៉ឹម ពិន
