សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្មករលាងរថយន្តម្នាក់រងរបួសធ្ងន់ធ្ងរត្រូវបានបញ្ជូនទៅមន្ទីរពេទ្យកាល់ម៉ែត ភ្លាមៗ បន្ទាប់ពីមានរថយន្តស៊េរីទំនើបបើកបរ ដោយយុវជនម្នាក់បើកបុក ។
ហេតុការណ៍នេះបានកើតឡើងនៅម៉ោងជាង១១ព្រឹក ថ្ងៃទី៥ ខែធ្នូ ឆ្នាំ២០១៨ នៅមុខហាងលក់សំបកកង់ សាន្ត បូព៌ា តាមបណ្តោយផ្លូវ៨៤ ភូមិ៨ សង្កាត់ស្រះចក ខណ្ឌដូនពេញ ។
ជនរងគ្រោះដែលត្រូវបានបញ្ជូនទៅមន្ទីរពេទ្យភ្លាមៗនោះមានឈ្មោះ អន់ សី អាយុ៣០ឆ្នាំ មុខរបរជាកម្មករលាងរថយន្ត ស្នាក់នៅកន្លែងធ្វើការ មានស្រុកកំណើតនៅ ស្រុកបាភ្នំ ខេត្តព្រៃវែង ។
យុវជនដែលបើករថយន្តបង្កមានឈ្មោះ អោប ពេជ្រ អាយុ២១ឆ្នាំ មុខរបរជាងជុសជួលរថយន្ត ។ រថយន្តដែលបង្កហេតុមានម៉ាក ឡង់គ្រីសឺ ពណ៌ខ្មៅ គ្មានស្លាកលេខ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុឈ្មោះ អោប ពេជ្រ (ជនបង្ក) បានបើករថយន្តទៅហាងលក់សំបក់កង់ឡាន សាន្ត បូព៌ា ដើម្បីដូរសំបកកង់ក្រោយ បន្ទាប់ពីដូរសំបកកង់រួចហើយ បានឡើងរថយន្តបំរុងនឹងបើកចេញ ដោយខ្វះការប្រុងប្រយ័ត្ន មិនបានមើលមុខ រវល់តែងាយក្រោយ ដោយសាររថយន្តមិនមានកញ្ចក់មើលក្រោយ ស្រាប់តែជ្រុងទៅ បុកកិនជនរងគ្រោះដែលកំពុងអង្គុយនោះ ចូលក្រោមរថយន្ត បណ្តាលអោយ រងរបួសក្បាលធ្ងន់ធ្ងរ។
ក្រោយពេលកើតហេតុ ជនរងគ្រោះត្រូវបានដឹកតាមម៉ូតូសណ្តោងរ៉ុម៉ក់ ទៅមន្ទីរពេទ្យកាល់ម៉ែតភ្លាមៗ ដើម្បីជួយសង្គ្រោះបន្ទាន់ ចំណែក(ជនបង្ក) ត្រូវបានសមត្ថកិច្ចឃាត់ខ្លួនបណ្តោះអាសន្ន ចំណែករថយន្តសមត្ថកិច្ចបានចុះវាស់វែង រួចយកទៅរក្សាទុកបណ្តោះអាសន្ននៅស្នងការនគរបាលចរាចរផ្លូវគោករាជធានីភ្នំពេញ៕ ជ្រោយពេជ្រ
