សារព័ត៌មាន នគរវត្ត តែងតែនាំមុខគេជានិច្ច
ប៉ោយប៉ែត ៖ លោកតាម្នាក់វ័យ៨០ឆ្នាំម្នាក់ រងរបួសធ្ងន់បាក់ភ្លៅ ដោយម៉ូតូបុក គ្រាដែលគាត់ជិះកង់ ។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង ៦និង៣០នាទីយប់ ថ្ងៃទី១២ ខែធ្នូ ឆ្នាំ២០១៨ នៅចំណុចមុខមន្ទីរអប់រំ យុវជន និងកីឡា ខេត្ត ស្ថិតក្នុងភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។
ព័ត៌មានពីនគរបាលមូលដ្ឋាន បានឲ្យដឹងថា៖ជនរងគ្រោះអ្នកជិះកង់ឈ្មោះ ណក ហម អាយុ ៨០ឆ្នាំ នៅ ភូមិសូភី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។ចំណែកអ្នកបើកបរម៉ូតូ ឈ្មោះ តូ ប៊ុនណារ៉ូ អាយុ ១៧ ឆ្នាំ នៅ ភូមិ ជំទាវ ឃុំ ឫស្សីក្រោកស្រុកមង្គលបូរី ខេត្តបន្ទាយមានជ័យ។
នគរបាលបានប្រាប់ទៀតថា៖ មុនពេលកើតហេតុគេបានឃើញ លោកតាវ័យ៨០ឆ្នាំ បានជិះកង់ ក្នុងទិសដៅពីកើតទៅលិច ពេលមកដល់ចំណុចកើតហេតុ គាត់បានបត់មកឆ្វេងដៃចូលមន្ទីរអប់រំ យុវជននិងកីឡាខេត្ត ស្របពេលនោះ ក៏មានម៉ូតូ១គ្រឿង បានបើកច្រាសទិសគ្នាមកពីលិចទៅកើតក្នុងល្បឿនលឿនហ្វ្រាំមិនទាន់ក៏ជ្រុលចង្កូតបុកអ្នកជិះកង់បណ្តាលឲ្យដួល រងរបួសធ្ងន់បាក់ភ្លៅខាងស្តាំ ចំណែកអ្នកជិះម៉ូតូរងរបួសស្រាល ជនរងគ្រោះទាំង២បានយកទៅមន្ទីរពេទ្យ ។
ចំពោះកត្តាដែលនាំឲ្យគ្រោះថ្នាក់នេះ គឺ បណ្តាលមកពីអ្នកជិះកង់ប្តូរទិសខ្វះការប្រុងប្រយ័ត្ន ហើយគ្មានសញ្ញាសម្គាល់ ។ ចំណែកអ្នកជិះម៉ូតូ បើកមានល្បឿនលឿន ។
បច្ចុប្បន្នវត្ថុតាងទាំងកង់និងម៉ូតូ យកមករក្សាទុកនៅអធិការដ្ឋាននគរបាលក្រុងសិរីសោភ័ណ រង់ចាំដោះស្រាយ ពេលក្រោយ៕ វណ្ណា
