ម្ចាស់រថយន្តចិត្តធម៌ ចេញថ្លៃ៦០០ដុល្លារ ឲ្យស្ត្រីម្នាក់ជិះម៉ូតូដួលក្រោមឡាន របួសដៃម្ខាង

ភ្នំពេញ៖ នារីម្នាក់បានជិះម៉ូតូមួយគ្រឿងបត់ឆ្លងផ្លូង និងគេចពីរថយន្តមួយគ្រឿងបណ្តាលឲ្យដួល និងដៃម្ខាងចូលយ៉ាន់កង់ក្រោយរថយន្តមួយគ្រឿងទៀត ដែលកំពុងបត់ឆ្លងផ្លូវដូចគ្នាបណ្តាលឲ្យរងរបួសដៃម្ខាងធ្ងន់ កាលពីវេលាម៉ោង៧ និង៣០នាទីយប់ ថ្ងៃទី២១ ខែធ្នូ ឆ្នាំ២០១៨ ស្ថិតនៅតាមបណ្តោយផ្លូវលេខ១៩៩ កែង និងផ្លូវលេខ២៧១ ក្នុងសង្កាត់ទំនប់ទឹក ខណ្ឌចំការមន រាជធានីភ្នំពេញ ។

តាមប្រភពព័ត៌មានពីកន្លែងកើតហតុបានឲ្យដឹងថា មុនពេលកើតហេតុ គេឃើញនារីម្នាក់ជិះម៉ូតូមួយគ្រឿងម៉ាកធូដេ ពណ៌ទឹកសមុទ្រ ពាក់ស្លាកលេខ ភ្នំពេញ 1FH-3878 បានចុះពីលើស្ពានអាកាសស្ទឹងមាជ័យ តាមបណ្តោយផ្លូវ២៧១ ទិសដៅពីជើងទៅត្បូង លុះមកដល់កែងផ្លូវ១៩៩ ក៏បានបត់ឆ្វេងបានបន្តិច ក៏បានគេចពីរថយន្តមួយគ្រឿងបណ្តាលដួលទៅលើថ្នល់ ខណៈនោះ ក៏មានរថយន្តស៊េរីទំនើបមួយគ្រឿងម៉ាកអេស្កាលេត ពណ៌ខ្មៅ ពាក់ស្លាកលេខ ខេមរភូមិន្ទ 01-2-0999 បើកបរដោយបុរសម្នាក់រួមដំណើរ និងស្ត្រីម្នាក់ទៀតបញ្ច្រាសគ្នា ទិសដៅពីត្បូងទៅជើងបានបត់ស្តាំចូលផ្លូវតែមួយ បណ្តាលឲ្យដៃឆ្វេងជនរងគ្រោះចូលក្នុងយ៉ាន់កង់រថយន្តផ្នែកខាងក្រោយរងរបួសធ្ងន់ បន្ទាប់មកត្រូវរថយន្តសង្គ្រោះបន្ទាន់មន្ទីរពេទ្យរុស្ស៊ីដឹកយកទៅសង្គ្រោះភ្លាមៗ ។

ក្រោយកើតហេតុសមត្ថកិច្ចមូលដ្ឋានបានចុះមកដល់កន្លែងកើតហេតុ ដោយភាគីទាំងសងខាងបានសម្របសម្រួលគ្នាដោយខាងភាគីខាងម្ចាស់រថយន្តបានប្រាប់ទៅអ្នកសារព័ត៌មានថា ខាងរថយន្តរបស់គាត់មិនខុសនោះទេ ឯខាងម៉ូតូនោះទេ ជាអ្នកខុស ព្រោះជិះមកដួលចូលកង់រថយន្តរបស់គាត់ដោយខ្លួនឯង តែដោយសាររូបគាត់មានកាអាណិតអាសូរ និងមានក្តីមេត្តា ស្ត្រីរងគ្រោះផងដែរនោះ រូបគាត់ក៏បានជូនថ្លៃព្យាបាលរបួសចំនួន៦០០ដុល្លារដើម្បីបញ្ចប់រឿងនៅ នឹងកន្លែងកើតហេតុ ៕ ភារ៉ា ដង្កោ