សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ មន្ត្រីយោធាវរៈការពារព្រំដែនកម្ពុជា.ថៃ ជួបគ្រោះថ្នាក់ចរាចរណ៍នៅលើកំណាត់ផ្លូវជាតិលេខ៥៥ បណ្ដាលឲ្យរងរបួសធ្ងន់(បាក់ភ្លៅ) រវាងម៉ូតូ និងអ្នកបើកបររថយន្តមិនស្គាល់ម៉ាក ១គ្រឿង នៅគ្រាដែលកំពុងធ្វើដំណើរច្រាសទិសគ្នា។
ហេតុការណ៍ខាងលើបានបង្កឡើងនៅវេលាម៉ោង៣ និង០០នាទី រសៀលថ្ងៃព្រហស្បត្តិ៍ ៥រោច ខែមិគសិរ ឆ្នាំច សំរិទ្ធស័ក ព.ស ២៥៦២ ត្រូវនឹងថ្ងៃទី២៧ ខែធ្នូ ឆ្នាំ២០១៨ នៅលើកំណាត់ផ្លូវជាតិលេខ៥៥ ត្រង់ចន្លោះបង្គោលគីឡូម៉ែត្រលេខ១៥០.១៥១ ស្ថិតក្នុងភូមិដីក្រហម ឃុំអន្លង់រាប ស្រុកវាលវែង ខេត្តពោធិ៍សាត់។
យោងតាមរបាយការណ៍នគរបាលស្រុកវាលវែងឃើញថា មុនកើតហេតុគេឃើញបុរសម្នាក់ស្លៀកពាក់ជាឯកសណ្ឋានយោធាធ្វើដំណើរម្នាក់ឯង ដោយម៉ូតូ ១គ្រឿងម៉ាក ហុងដាឌ្រីម សេ១២៥ សេរីឆ្នាំ២០១០ ពណ៏ខ្មៅ ពាក់ស្លាកលេខ ពោធិសាត់ 1C 0691 ក្នុងទិសដៅពីកើតឆ្ពោះទៅទិសខាងលិច លុះដល់ចំណុចកើតហេតុបានបុកជាមួយរថយន្ត ១គ្រឿងច្រាស់ទិសគ្នា ប៉ុន្តែរថយន្តនោះគេមើលមិនទាន់ទេព្រោះបន្ថែមល្បឿនទៅបាត់ បណ្ដាលឲ្យភាគ្គីខាងម៉ូតូរងរបួសធ្ងន់(បាក់ភ្លៅស្ដាំ)។
របាយការណ៍ខាងលើបន្តថា ជនរងរបួសឈ្មោះ ឃុន ហៃ ភេទប្រុស អាយុ ៤០ឆ្នាំ ជនជាតិខ្មែរ មានទីលំនៅភូមិព្រៃខ្លា ឃុំត្នោតជុំ ស្រុកក្រគរ ខេត្តពោធិ៍សាត់ មុខរបរយោធាវរៈការពារព្រំដែនកម្ពុជស.ថៃ ស្ថិតក្នុងឃុំថ្មដា ស្រុកវាលវែង។
ក្នុងរបាយការណ៍ដដែលបន្តទៀតថា ចំពោះជនរងរបួសសមត្តកិច្ច និងសាច់ញាតិចាត់ចែងបញ្ជូនទៅសង្រ្គោះភ្លាមៗ នៅមន្ទីរពេទ្យបង្អែកខេត្តពោធិ៍សាត់ ចំណែកវត្ថុតាងសមត្ថកិច្ចជំនាញកំពុងចាត់ចែង និងកំពុងស្រាវជ្រាវ៕ ប៉ឹម ពិន
