សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ: មានហេតុការគ្រោះថ្នាក់ចរាចរណ៍គួរឲ្យញាក់សាច់និងរន្ធត់មួយ បង្កឡើងដោយរថយន្តម៉ាកហាយឡែនឌ័រ ពណ៌ស្ករ ពាក់ស្លាកលេខ ភ្នំពេញ 2AU-7985 បើកបត់ខ្វះការប្រុងប្រយត្ន័ បានបុកជាមួយម៉ូតូសណ្តោងរ៉ឺម៉កពេញទំហឹងលាន់ស្នូរដូចរន្ទះបណ្តាលឲ្យដាច់ម៉ូតូចេញពីរ៉ឺម៉កនិងបានធ្វឲ្យ ស្លាប់បុរសអ្នកបើរ៉ឺម៉កម៉ូតូម្នាក់យ៉ាងអាណោចអាធ័ម។
ឧបទ្ទវហេតុគ្រោះថ្នាក់ចរាចរណ៍គួររន្ធត់នេះកើតឡើងនៅម៉ោង៤និង៣០នាទីរសៀលថ្ងៃសុក្រ ១៣រោច ខែមិគសិរ ឆ្នាំ ច សំរឹទ្ធិស័ក ព.ស.២៥៦២ ត្រូវនឹង ថ្ងៃទី៤ ខែមករា ឆ្នាំ២០១៩ នៅលើផ្លូវជាតិលេខ៤ ក្នុងភូមិស្រែថ្នល់ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ។
មន្ត្រីនគរបាលក្រុងច្បារមនបានឲ្យដឹងថា សពជនរងគ្រោះមានឈ្មោះ ហៀង សន ភេទប្រុស អាយុ៣៨ឆ្នាំ ស្នាក់នៅឃុំតាំងសំរោង ស្រុកភ្នំស្រួច ខេត្តកំពង់ស្ពឺ។
ក្រោយកើតហេតុ សមត្ថកិច្ចជំនាញចរាចរណ៍ទៅដល់បានធ្វើការវាស់វែង យករថយន្តនិងម៉ូតូទៅរក្សាទុករង់ចាំដោះស្រាយគ្នាតាមច្បាប់បន្តទៀត ខណៈដែលអ្នកបើករថយន្តបង្កគេចខ្លួនបាត់ ។ ចំណែកសាកសពជនរងគ្រោះត្រូវបានសមត្ថកិច្ចជំនាញប្រគល់ឲ្យសាច់ញាតិធ្វើបុណ្យតាមប្រពៃណីនៅគេហដ្ឋាន៕ ប្រាថ្នា
