សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ រថយន្តធំដឹកដំឡូងមីមួយគ្រឿងខណៈកំពុងបើកបរបានដាច់ហ្វ្រាំងបុកប៉ើងរបងសាលារៀនកាលពីម៉ោង១១និង៥០នាទីព្រឹកថ្ងៃអាទិត្យ ១ កើត ខែបុស្ស ឆ្នាំ ច សំរឹទ្ធិស័ក ព.ស.២៥៦២ ត្រូវនឹង ថ្ងៃទី៦ខែមករាឆ្នាំ២០១៩ មណ្ឌលវិទ្យាល័យសិរីសោភ័ណក្នុងភូមិ១សង្កាត់ព្រះពន្លាក្រុងសិរីសោភ័ណ ធ្វើឲ្យសមណសិស្សបេក្ខជន-នារីរាប់ពាន់នាក់ដែលកំពុងអង្គុយប្រឡងធម្មវិន័យព្រលឹងចុងសក់គ្រប់ៗគ្នា។
ប្រភពព័ត៌មានពីកន្លែងកើតហេតុបានឲ្យដឹងថា គ្រោះថ្នាក់ចរាចរណ៍នោះកើតឡើង ដោយសាររថយន្តយីឌុបកង់១៦ម៉ាកពាក់ស្លាកលេខភ្នំពេញ៣B៤២៩៩ដឹកទំនិញធុនធំ(ដឹកមើមដំឡូងមីស្ងួត)កង់១៦ដាច់ហ្វ្រាំងជ្រុលទៅបុករបងសាលារៀន និងម៉ូតូឈប់ចត ធ្វើដំណើរក្នុងទិសដៅពីលិចទៅកើត បណ្តាលឲ្យខូចខាតយ៉ាងដំណំ ។
យ៉ាងណាគ្រោះថ្នាក់ចរាចរណ៍បុកលាន់ឮដូចរន្ទះនេះចាត់ទុកថា ជាសំណាង១ក្នុង១ពាន់គ្រោះថ្នាក់ដោយសារគ្មានបង្កឱ្យមនុស្សណាម្នាក់រងរបួសឬស្លាប់ឡើយ។ប៉ុន្តែធ្វើឱ្យមនុស្សម្នានៅម្តុំនោះជាពិសេសបេក្ខជន-នារីដែលភាគច្រើនជាសមណសិស្សជិត២.០០០នាក់កំពុងអង្គុយប្រឡងយកវិញ្ញាបនបត្រធម្មន័យថ្នាក់ត្រី.ទោ.ឯកឆ្នាំ២០១៨- ២០១៩ នៅក្នុងវិទ្យាល័យសិរីសោភ័ណក្រុងសិរីសោភ័ណខេត្តបន្ទាយមានជ័យភ័យព្រលឹងចុងដែរ ។
មន្រ្តីនគរបាលក្រុងសិរីសោភ័ណបានឲ្យដឹងថា ករណីនេះបង្កឱ្យខូចខាតម៉ូតូ១គ្រឿងដែលចតទីនោះ និងរថយន្តបង្ក១គ្រឿង ខូចខាតធ្ងន់ហើយត្រូវបាននគរបាលនាំយកមករក្សាទុកនៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្ត រង់ចាំដោះស្រាយសងការខូចខាតដល់សាលារៀន ,ម្ចាស់ម៉ូតូនិងបំពេញនិតិវិធីពេលក្រោយ ៕ សហការី
