សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ នាង ជ គីមអ៊ាង ហៅ ចរណៃ ដែលបានរត់គេចខ្លួនជាងកន្លះឆ្នាំ ក្រោយធ្វើសកម្មភាពលួច ត្រូវបាននគរបាលចាប់ខ្លួន ហើយបញ្ជូនទៅឃុំឃាំងតាមអំណាចដីកាបង្គាប់ឲ្យឃុំខ្លួន ។
នគរបាលឲ្យដឹងថា ជនត្រូវចោទឈ្មោះ ជ គីមអ៊ាង ហៅ ចរណៃ ភេទស្រី អាយុ២៩ឆ្នាំ រស់នៅភូមិជ្រៃបិទមាស សង្កាត់សួង ក្រុងសួង ខេត្តត្បូងឃ្មុំ ហើយត្រូវបានចាប់ខ្លួននៅថ្ងៃទី៩ ខែមករា ឆ្នាំ២០១៩នេះ ស្ថិតក្នុងភូមិកំណើតរបស់នាងតែម្ដង ។
ក្រោយការចាប់ខ្លួនជនត្រូវចោទខាងលើនេះ នៅថ្ងៃខែឆ្នាំដដែល លោក ហាក់ សៀកលីម ព្រះរាជអាជ្ញារងសាលា ដំបូងខេត្តត្បួងឃ្មុំ បានបញ្ជាអោយជំនាញអធិការដ្ឋាននគរបាលក្រុងសួង បញ្ជូនជនត្រូវចោទឈ្មោះ ជ គីមអ៊ាង ហៅ ចរណៃ ភេទ ស្រី អាយុ២៩ឆ្នាំ នៅភូមិជ្រៃបិទមាស សង្កាត់សួង ក្រុងសួង ខេត្តត្បូងឃ្មុំ ទៅកាន់ពន្ធនារខេត្តត្បូងឃ្មុំ តាមដីកាបង្គាប់អោយឃុំខ្លួនលេខ ២៣/២០១៩ របស់លោក ឈិត មិនា ចៅក្រមសើបសួរសាលាដំបូងខេត្តត្បូងឃ្មុំ ពីបទលួច ដែលបានប្រព្រឹត្តនៅភូមិសួងលិច សង្កាត់សួង ក្រុងសួង ខេត្តត្បូងឃ្មុំ កាលពីថ្ងៃទី៣ ខែមិថុនា ឆ្នាំ២០១៨កន្លងទៅ អនុវត្តតាមបទល្មើសដែលមានចែងឲ្យផ្តន្ទាទោសតាមមាត្រា ៣៥៣ និងមាត្រា ៣៥៦ នៃក្រមព្រហ្មទណ្ឌ ៕ វណ្ណៈ
