សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជនម្នាក់បានស្លាប់ភ្លាមនៅកន្លែងកើតហេតុនិងម្នាក់ទៀតបានរងរបួសធ្ងន់ត្រូវបានបញ្ជូនទៅសង្គ្រោះភ្លាមៗខណះជិះម៉ូតូលឿនដល់ចំណុចផ្លូវកោងមិនបន្ថយល្បឿនក៏ជ្រុលបុករថយន្តខ្ទៀតទៅបោកក្បាលនិងលូថែមទៀត។
ហេតុការណ៍នេះបានកើតឡើង កាលពីវេលា ម៉ោង៦និង៤៥នាទីយប់ ថ្ងៃ ពុធ ៤កើត ខែបុស្ស ឆ្នាំច សំរឹទ្ធស័ក ពស២៥៦២ ត្រូវនិងថ្ងៃទី៩ ខែមករា ឆ្នាំ២០១៩ ស្ថិតនៅតាមផ្លូវបេតុង ក្នុងភូមិបឹងធំទី៣ សង្កាត់បឹងធំ ខណ្ឌពោធិសែនជ័យ រាជធានីភ្នំពេញ។
ជនរងគ្រោះ ឈ្មោះ សុខ ម៉េងសឺ ភេទប្រុស អាយុ១៦ឆ្នាំ ជនជាតិខ្មែរ មុខរបរ សិស្ស មានទីលំនៅ ភូមិបឹងធំទី១ សង្កាត់ បឹងធំ ខណ្ឌពោធិសែនជ័យ រងរបួសធ្ងន់ ។ រួមដំណើរជាមួយជនរងគ្រោះ ឈ្មោះ ទិត្យ ប៊ុនលី ភេទប្រុស អាយុ១៥ឆ្នាំ ជនជាតិខ្មែរ មុខរបរ សិស្ស មានទីលំនៅភូមិបឹងធំទី១ សង្កាត់បឹងធំ ខណ្ឌពោធិសែនជ័យ ស្លាប់ភ្លាមៗនៅកន្លែង ។
តាមប្រភពពីប្រជាពលរដ្ឋបានឲ្យដឹងថាមុនពេលកើតហេតុគេឃើញជនរងគ្រោះ ជិះម៉ូតូ ម៉ាកស៊ុយហ្សុយគី និច ពណ៌ស ពាក់ស្លាកលេខ ភ្នំពេញ 1CU-5073 ជិះគ្នា២នាក់ ឌុបគ្នា ល្បឿនលឿន តាមបណ្តោយផ្លូវបេតុង ពីលិចទៅកើត ដល់ចំណុចកើតហេតុខាងលើ ក្នុងស្ថានភាពផ្លូវកោងផងក៏ បានទៅបុកជាមួយរថយន្តម៉ាក នីសាន់ បែន ដឹកដីកង់៦ ពណ៌ខៀវ ពាក់ស្លាកលេខ ចង្កូតស្តាំ PP-0368 បើកពីកើតទៅលិច បញ្ច្រាស់ទិសគ្នា បណ្តាលឲ្យ អ្នកបើកបរម៉ូតូ បុកផ្ទប់កញ្ចក់រថយន្ត រងរបួសធ្ងន់ ត្រូវបានរថយន្តសង្រ្គោះដឹកទៅមន្ទីពេទ្យភ្លាមៗ រីឯអ្នករួមដំណើរ ជិះខាងក្រោយខ្ទាតផ្លោងទៅបុកផ្ទប់លូ ដាក់នៅចិញ្ចើមផ្លូវ បណ្តាលឲ្យ បាក់កស្លាប់ ភ្លាមៗនៅកន្លែង បាក់ បែកទាំងលូ ។ ម៉ូតូរងការខូចខាតផ្នែកខាងមុខស្ទើរតែទាំងស្រុង។ចំណែកឯរថយន្តរងការខូចខាតផ្នែកខាងមុខចំហៀងខាងស្តាំ។ ក្រោយពីបុក ហើយតៃកុងរថយន្តមើលសភាពមិនស្រួលបានបើកទ្វារចុះរត់បាត់ស្រមោល បន្សល់ទុកតែរថយន្តនៅកន្លែងកើតហេតុ។
ក្រោយមកក៏មានសមត្ថកិច្ចមូលដ្ឋានចុះមកដល់ហើយក៏ទំនាក់ទំនងទៅសមត្ថកិច្ចជំនាញចរាចរណ៏មកវាស់វែងយក ម៉ូតូនិងរថយន្តទៅរក្សាទុកនៅការិយាល័យចរាចរណ៏ផ្លូវគោកនៃស្នងការនគរបាលរាជធានីភ្នំពេញរងចាំម្ចាស់រថយន្តចូលខ្លួនមកដោះស្រាយតាមផ្លូវច្បាប់។ ចំណែកសាកសព សមត្ថកិច្ចធ្វើកំណត់ហេតុរួចប្រគល់ឲ្យសាច់ញាតិយកទៅធ្វើបុណ្យតាមប្រពៃណី ៕ សុខាសែនជ័យ
