សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ យុវជនម្នាក់ ត្រូវបានកម្លាំងផ្នែកប្រឆាំងគ្រឿងញៀននៃអធិការដ្ឋាននគរបាលស្រុកសំពៅលូន សហការជាមួយកម្លាំងនគរបាលការិយាល័យប្រឆាំងគ្រឿងញៀន ធ្វើការឃាត់ខ្លួន កាលពីព្រឹក ថ្ងៃអង្គារ ១០ កើត ខែបុស្ស ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៥ ខែមករា ឆ្នាំ២០១៩ ពីបទជួញដូរដោយខុសច្បាប់នូវសារធាតុញៀន ។
មន្ត្រីនគរបាលការិយាល័យប្រឆាំងគ្រឿងញៀនខេត្តបានឲ្យដឹងថា ជនសង្ស័យឈ្មោះ ឆាំ ដុំ ភេទប្រុស អាយុ២៧ឆ្នាំ ជនជាតិខ្មែរ មុខរបរកម្មករ មានទីលំនៅភូមិទួលជ្រៃ ឃុំសំពៅលូន ស្រុកសំពៅលូន ខេត្តបាត់ដំបង។ជនសង្ស័យរូបនេះត្រូវឃាត់ខ្លួនតាមអំណាចដីកាបង្គាប់ឲ្យនាំខ្លួនលេខ៥៨៥ ចុះថ្ងៃទី២៤ ខែធ្នូ ឆ្នាំ២០១៨ ចេញដោយលោក ញាណ សុវណ្ណ ចៅក្រមស៊ើបសួរនៃសាលាដំបូងខេត្តបាត់ដំបង បង្គាប់ឲ្យចាប់ខ្លួនឈ្មោះ ឆាំ ដុំ ពីបទជួញដូរដោយខុសច្បាប់នូវសារធាតុញៀន ប្រព្រឹត្តនៅចំណុចភូមិទួលជ្រៃ ឃុំសំពៅលូន ស្រុកសំពៅលូន ខេត្តបាត់ដំបង កាលពីថ្ងៃទី២៤ ខែសីហា ឆ្នាំ២០១៨។
វត្ថុតាងចាប់យកបានរួមមាន ថ្នាំញៀនប្រភេទម៉ាទឹកកកចំនួន១កញ្ចប់ អាវុធកែច្នៃ១ដើម ម៉ូតូ១គ្រឿង ម៉ាកហុងដាឃ្លីច ស៊េរីឆ្នាំ២០១៩ ពណ៌ខ្មៅលាយឈាមជ្រូក ពាក់ស្លាកលេខបន្ទាយមានជ័យ 1K-7023 ទូរស័ព្ទ១គ្រឿង និងសម្ភារៈប្រើប្រាស់ថ្នាំញៀនមួយចំនួនទៀត រួចកសាងសំណុំរឿងចាត់ការតាមច្បាប់ ៕ ប្រាថ្នា
