ព័ត៌មានទាន់ហេតុការណ៍៖

សម្តេចតេជោ ហ៊ុន សែន អញ្ជើញជួបពិភាក្សាការងារជាមួយប្រធានសភាប្រឹក្សានយោបាយប្រជាជនចិន

ចែករំលែក៖

ចិន៖ នៅថ្ងៃរសៀលទី ២២​ ខែមករា​ ឆ្នាំ២០១៩ នេះសម្ដេចតេជោនាយករដ្ឋមន្ត្រីបានអញ្ជើញជួបពិភាក្សាការងារជាមួយ ឯកឧត្តម វ៉ាង យ៉ាង ប្រធានសភាប្រឹក្សានយោបាយប្រជាជនចិន។ ក្នុងជំនួបនោះ ឯកឧត្តម វ៉ាង យ៉ាង បានមានប្រសាសន៍ស្វាគមន៍សម្ដេចតេជោនាយករដ្ឋមន្ត្រី ដោយគួសបញ្ជាក់ថាដំណើរទស្សនកិច្ចរបស់សម្ដេចតេជោមកប្រទេសចិននៅពេលនេះ គឺជាការរួមចំណែកក្នុងការជំរុញកិច្ចសហប្រតិបត្តិការរវាងប្រទេសចិន។ ឯកឧត្តមបានមានប្រសាសន៍ថាសម្តេចតេជោគឺជាមេដឹកនាំនយោបាយមួយរូបដែលមានបទពិសោធច្រើនហើយ ឯកឧត្តមក៏បានអបអរសាទរចំពោះលទ្ធផលនៃការបោះឆ្នោតរបស់ប្រទេសកម្ពុជានៅឆ្នាំ ២០១៨ កន្លងទៅនេះ ដែលគណបក្សប្រជាជនកម្ពុជាបានឈ្នះភ្លូកទឹកភ្លូកដី និងបានអបអរសាទរសម្ដេចតេជោដែលត្រូវបានជាប់ឆ្នោតសារជាថ្មីទៀតជានាយករដ្ឋមន្រ្តីនៃព្រះរាជាណាចក្រកម្ពុជាសាជាថ្មីទៀត។

ជាការឆ្លើយតប សម្ដេចតេជោនាយករដ្ឋមន្ត្រីបានអរគុណចំពោះពាក្យពេចន៍ និងចំពោះការស្វាគមន៍របស់ភាគីចិនក្នុងទស្សនកិច្ចរបស់សម្តេច និងគណៈប្រតិភូ។ សម្ដេចតេជោក៏បានពាំនាំនូវការសួរសុខទុក្ខពីសំណាក់សម្តេច សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា។ សម្តេចតេជោនាយកមន្ត្រីបានមានប្រសាសន៍ថាដំណើរទស្សនកិច្ចផ្លូវការរបស់សម្ដេចគឺមានសារសំខាន់នេះមិនត្រឹមតែសម្ដេចនោះទេ គឺរួមទាំងសម្រាប់បម្រើផលប្រយោជន៍នៃប្រទេសទាំងពីរដើម្បីចូលរួមចំណែកលើកម្រិតទំនាក់ទំនង កិច្ចសហប្រតិបត្តិការរវាងប្រទេសទាំងពីរផងដែរ។ សម្តេចតេជោបានបន្តថា នៅឆ្នាំ២០១៨ កន្លងទៅនេះគឺប្រទេសកម្ពុជា និងប្រទេសចិនបានប្រារព្ធខួបលើកទី៦០​ នៃទំនាក់ទំនងការទូតរវាងប្រទេសទាំងពីរ ហើយសម្តេចបានរំលឹកពីទំនាក់ទំនង និងតួនាទីរបស់សម្ដេចឪ ព្រះនរោត្តមសីហនុ ជាមួយថ្នាក់ដឹកនាំចិន ដូចជា ឯកឧត្តមប្រធាន ម៉ៅ សេទុង និងស៊ូ អីនឡាយជាដើម ដែលបានបង្កើតទំនាក់ទំនងទ្វេភាគីនាពេលនោះរវាងប្រទេសយើងទាំងពីរ ហើយទំនាក់ទំនងរវាងប្រទេសទាំងពីរគឺជាពិសេសដោយសារព្រះអង្គបានចាប់ផ្ដើមក្នុងការកសាងទំនាក់ទំនងរវាងចិន និងកម្ពុជាដែលទោះបីជានៅពេលនោះស្ថានភាពអន្តរជាតិមិនផ្ដល់អនុគ្រោះសម្រាប់កម្ពុជាក៏ដោយ ក៏ប៉ុន្តែកម្ពុជាបានគាំទ្រប្រទេសចិនជាពិសេសកៅអីនៅអង្គការសហប្រជាជាតិ ជាសមាជិកអចិន្ត្រៃយ៍នៃក្រុមប្រឹក្សាសន្តិសុខនៃអង្គការសហប្រជាជាតិ ដែលនេះដោយសារសម្ដេចឪមានចក្ខុវិស័យយូរអង្វែងដែលគិតថាពេលនោះគឺចិនអាចតំណាងនៃប្រទេសចិនទាំងមូល ដូច្នេះសម្ដេច ក៏បានគោរពនូវចក្ខុវិស័យយូរអង្វែងរបស់ព្រះក្នុងការកសាងទំនាក់ទំនងចាប់ពីដើមទីរហូតមកដល់ពេលនេះ។

សម្ដេចតេជោបានគូសបញ្ជាក់ថាយើងពិតជាបានទទួលផលប្រយោជន៍ច្រើនពីប្រទេសចិនហើយការរីកចម្រើននេះមិនត្រឹមតែខ្លួនឯងទេគឺសម្រាប់ប្រទេសដ៏ទៃផ្សេងទៀតផងដែរ។ ចំពោះគំនិតផ្ដួចផ្ដើមខ្សែក្រវាត់មួយ ផ្លូវមួយវិញ សម្តេចបានមានប្រសាសន៍ថាពិតជាបានផ្ដល់នូវអត្ថប្រយោជន៍សម្រាប់ភាគីទាំងអស់ដែលចូលរួមនៅក្នុងគំនិតនេះ ហើយផ្អែកទៅលើស្ថានភាពនេះ កម្ពុជាក៏ផ្សារភ្ជាប់ជាមួយនឹងយុទ្ធសាស្រ្តចតុកោណរបស់រាជរដ្ឋាភិបាលកម្ពុជាផងដែ។ សម្ដេចតេជោបានគួសបញ្ជាក់អំពីគម្រោងជាច្រើនដែលនៅក្នុងដែលស្ថិតនៅក្រោមគំនិតផ្ដួចផ្ដើមខ្សែក្រវ៉ាត់មួយ ផ្លូវមួយ និងយុទ្ធសាស្ត្រចតុកោណនៃរាជរដ្ឋាភិបាលកម្ពុជា ដែលកាលពីម្សិលមិញសម្ដេចបានជួបចរចាជាមួយឯកឧត្តមប្រធានាធិបតី ស៊ី ជិនពីង ក្នុងការពិគ្រោះយោបល់អំពីស្ថានភាពនៅកម្ពុជាជាពិសេសទៅលើសេដ្ឋកិច្ចនៅក្នុងប្រទេសកម្ពុជាកន្លងទៅនេះគឺមានការរីកចំរើនជាពិសេសកំណើនសេដ្ឋកិច្ច ៧.៣​ ភាគរយ ក្នុងឆ្នាំ ២០១៨ កន្លងទៅនេះ ហើយភាពរីកចម្រើននេះក៏ដោយសារមានវិនិយោគរបស់ចិនមកបណ្តាក់ទុននៅក្នុងប្រទេសកម្ពុជាផងដែរ។

សម្តេចតេជោក៏បានផ្លាស់ប្ដូរមតិជុំវិញស្ថានភាពជុំវិញតំបន់ ជាពិសេសទាក់ទងសមុទ្រចិនខាងត្បូងនិងទំនាក់ទំនងរវាងអាស៊ានចិន ក្រៅពីនោះសម្ដេចក៏បានមានប្រសាសន៍ពាក់ព័ន្ធនៅសេដ្ឋកិច្ចជាពិសេសសម្តេចតេជោក៏បានអរគុណមិត្តចិនដែលបានប្រកាសថាបង្កើនកូតាឲ្យកម្ពុជានាំអង្ករមកប្រទេសចិនពី ៣០ ទៅ ៤០ ម៉ឺនតោននៅ ២០១៩ នេះ។ សម្តេចក៏បានអញ្ជើញ ឯកឧត្តម វ៉ាង យ៉ាង មកទស្សនកិច្ចនៅប្រទេសកម្ពុជានៅពេលណាសមស្របទៅមុខ ហើយឯកឧត្តមប្រធានក៏បានឆ្លើយតបអរគុណសម្តេចចំពោះការអញ្ជើញរបស់សម្តេច ហើយឯកឧត្តម នឹងរកពេលវេលាសមស្របណាមួយនាពេលខាងមុខ​។

ឯកឧត្តមបាន គួរបញ្ជាក់ ថាបច្ចុប្បន្ននេះចិនបានចាត់ទុកទំនាក់ទំនងរវាងចិន និងកម្ពុជា គឺល្អបំផុតនៅក្នុងប្រវត្តិសាស្ត្រនៃប្រទេសទាំងពីរហើយដោយសារមានកិច្ចសហប្រតិបត្តិការជាច្រើនគ្រប់លំដាប់លើគ្រប់វិស័យជាពិសេសទៀតគឺគេមានកិច្ចសហប្រតិបត្តិការ និងការសម្របសម្រួលរវាងប្រទេសទាំងពីរក្នុងកម្រិតអន្តរជាតិផងដែរ។ ឯកឧត្តមចិន នឹងបន្តធ្វើការជាមួយគ្នាទៅលើកិច្ចសហប្រតិបត្តិការរវាងភាគីទាំងពីរជាពិសេសជាពិសេសកិច្ចសហប្របត្តិការទៅលើភាពជាដៃគូយុទ្ធសាស្រ្តគ្រប់ជ្រុងជ្រោយផ្នែកនយោបាយ សន្តិសុខ សេដ្ឋកិច្ចនិងប្រជាជននិងប្រជាជនផងដែរ។ ឯកឧត្តមពិតជាគាំទ្រចំពោះគ្រប់ទិសដៅរបស់សម្ដេចដែលបានបង្កើតឧត្តមក្រុមប្រឹក្សាពិគ្រោះ និងផ្ដល់យោបល់នោះដែលជាយន្តការថ្មីមួយទៀតក្នុងប្រទេសកម្ពុជានេះហើយឯកឧត្តមថាស្ថាប័នទាំងសងខាង និងបន្តកសាងទំនាក់ទំនងកាន់តែជិតស្និទ្ធបន្ថែមទៀតហើយនឹងមានការផ្លាស់ប្ដូរការទស្សនកិច្ចគ្នាទៅវិញទៅមកក្នុងកម្រិតខ្ពស់ជាបន្តបន្ទាប់ទៀត៕


ចែករំលែក៖