សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ផ្លូវប្រវែង១០០ម៉ែត្រ ស្រុតខូចក្លាយជាថ្លុកត្រពាំង ឬស្រះចិញ្ចឹមត្រី ដោយសារគ្មានលូ បង្ហូរ ចេញថែមទាំងមានទឹកហូរចេញមកពីតាមផ្ទះដែលសង់អមតាមបណ្តោយដងផ្លូវ និងយកចំណីផ្លូវ ធ្វើជាកន្លែងលក់ដូរធ្វើឲ្យដងផ្លូវស្រុតខូចក្លាយជារណ្តៅដក់ទឹកខួបប្រាំង ខួបវស្សា។
បើតាមអាជ្ញាធរ ឃុំបានសំរោងឲ្យដឹងថា ផ្លូវក្នុងឃុំ សំរោងត្រូវបានរាជរដ្ឋាភិបាលឲ្យកងវិស្វកម្មអគ្គនាយកដ្ឋានវិស្វកម្ម នៃកងយោធពលខេមរភូមិន្ទសាងសង់ជាផ្លូវក្រាលកៅស៊ូ រួមទាំងផ្លូវទៅកាន់ច្រកទ្វារព្រំដែនទ្វេភាគី សំរោងគឺក្រាលកៅស៊ូអស់ហើយនៅសល់តែប្រវែង៥០០ម៉ែត្រនៅខាងកើតកាស៊ីណូសៀងហៃទៅកាន់ច្រកទ្វារសំរោងកងវិស្វកម្មមិនធ្វើ។
ម្ចាស់កាស៊ីណូគេលើកថ្នល់នៅមុខកាស៊ីណូខ្ពស់ខាងលិច ខាងកើត ទើបនៅពីមុខផ្ទះរបស់ប្រជាពលរដ្ឋទាបក្លាយទៅជាថ្លុកទឹកហើយដោយផ្ទះអមសងខាងផ្លូវសង់ខ្ពស់ជាងផ្លូវ និងគ្មានប្រពន្ធ័លូបង្ហូរទឹកចេញផងបណ្តាលឲ្យទឹកប្រើប្រាស់តាមផ្ទះហូរចាក់ មកលើថ្នល់ដឹកទឹក ហើយគួបផ្សំរថយន្តធុនធបើកឆ្លងកាត់ធ្វើឲ្យបាក់ស្រុតកាន់តែជ្រៅ និងដក់ទឹកលើជង្គង់ធ្វើឲ្យពិបាក ក្នុងការធ្វើដំណើរយ៉ាងខ្លាំង។
ចំណែកមន្ត្រីសាលាស្រុកចន្ទ្រា បានបង្ហើបឲ្យដឹងថា នៅទីប្រជុំជនសំរោងនេះមានកាស៊ីណូចំនួន៩កំពុងដំណើរការប្រកបមុខរបរ រកស៊ីហើយម្ចាស់កាស៊ីណូទាំងនោះចាក់ដីលើកថ្នល់ និងចាក់រាលសាបនៅខាងមុខកាស៊ីណូរបស់ខ្លួន រៀងៗខ្លួន ទើបធ្វើឲ្យថ្នល់ដែលនៅមុខផ្ទះរបស់ប្រជាពលរដ្ឋនៅកណ្តាលប្រវែងជាង១០០ម៉ែត្រ ក្លាយជារណ្តៅស្រះដក់ទឹកបែបនេះ។
ប្រជាពលរដ្ឋរស់នៅតាមដងផ្លូវ ក៏ដូចជាអ្នកធ្វើដំណើរតាមផ្លូវនេះបានសំណូមពរដល់អាជ្ញាធរឃុំសំរោង និងអាជ្ញាធរស្រុកចន្ទ្រា មេត្តាចុះមកពិនិត្យមើលផ្លូវមួយខ្សែនេះផង ព្រោះវាស្រុតខូចអស់ហើយ៕ យឹម សុថាន
