សារព័ត៌មាន នគរវត្ត តែងតែនាំមុខគេជានិច្ច
ក្រោយពេលគណៈកម្មការរៀបចំការបើឆ្នោតថៃបានប្រកាស ជាផ្លូវការថា ការបោះឆ្នោតជាតិនឹងត្រូវធ្វើឡើងនៅថ្ងៃទី២៤ ខែមីនា ខាងមុខ ។ នៅពេលមានកាលបរិច្ឆេទច្បាស់លាស់ បណ្តាគណបក្សនយោបាយថៃ បានដាក់គំនាបទៅលើនាយករដ្ឋមន្ត្រី រំលាយគណៈរដ្ឋមន្ត្រី និងលាលែងពីតំណែង ។
កន្លងមក ប្រធានគណៈកម្មការរៀបចំការបោះឆ្នោតថៃ លោក Itthiporn Boonprakong បានឲ្យដឹងថា ក្រោយពេលច្បាប់បញ្ជឲ្យរៀបចំការបោះឆ្នោត ត្រូវបានព្រះមហាក្សត្រប្រកាស គណៈកម្មការបានជួបប្រជុំ នឹងចេញសេចក្តីសម្រេចភ្លាមៗ ។ នៅពេលនេះដែរ បណ្តាគណបក្សនយោបាយ បេក្ខភាពតំណាងរាស្ត្រ នឹងដាក់សំណើឈរឈ្មោះជាបេក្ខភាពទៅកាន់គណៈកម្មការ ចាប់ពីថ្ងៃទី៤ ដល់ថ្ងៃទី៨ ខែកុម្ភៈ ខាងមុខ ។ បញ្ជីឈ្មោះ បេក្ខភាព នឹងត្រូវបានប្រកាសជាផ្លូវការ នៅថ្ងៃទី១៥ ខែកុម្ភៈ ឆ្នាំ២០១៩ ហើយការបោះឆ្នោតនឹងត្រូវបានធ្វើឡើងនៅថ្ងៃទី២៤ ខែមីនា ឆ្នាំ២០១៩ ។
ដោយមានកាលបរិច្ឆេទច្បាស់លាស់ បណ្តាគណបក្សនយោបាយថៃ បានដាក់គំនាបឲ្យនាយករដ្ឋមន្ត្រីថៃ លោក ប្រាយុទ្ធ ចាន់ អូចារ្យ លាលែងពីតំណែង និង រំសាយគណៈរដ្ឋមន្ត្រីដើម្បីត្រៀមបោះឆ្នោតនៅចុងខែមីនាខាងមុខ ។
តាមការលើកឡើងរបស់បណ្តាគណបក្សនយោបាយថៃ រដ្ឋាភិបាលបានឆ្លៀតឱកាសកាន់អំណាចដើម្បីសម្រេចគោលនយោបាយដែលផ្តល់ផលប្រយោជន៍ដល់ខ្លួន និងធ្វើឲ្យបក្សប្រឆាំង កាន់តែ ធ្លាក់ចុះ ។ គណបក្សភឿថៃ បានស្នើដល់ លោកប្រាយុទ្ធ ចាន់អូចារ្យ លាលែងពីតំណែង និងបិទទ្វារដ្ឋាភិបាល បញ្ចប់កម្មវិធីប្រើប្រាស់មូលនិធិរដ្ឋ និងបញ្ជប់ការដាក់ពង្រាយយោធា ។
ក្នុងពេលនេះដែរ គណបក្សប្រជាធិបតេយ្យ បានទាមទារនាយករដ្ឋមន្ត្រីបញ្ឈប់ការប្រើប្រាស់មាត្រាទី៤៤ នៃរដ្ឋធម្មនុញ្ញ ដោយត្រូវបានគេចាត់ទុកថា ជាអាវុធសំខាន់ត្រូវបានរដ្ឋាភិបាលប្រើប្រាស់ តាំងពីក្រោយការធ្វើរដ្ឋប្រហារនៅឆ្នាំ២០១៤ ។ នៅពេលនេះ រដ្ឋាភិបាលត្រូវតែរក្សាទម្រង់ជារដ្ឋាភិបាលបណ្តោះអាសន្ន ប៉ុណ្ណោះ រង់ចាំការផ្ទេរអំណាចដល់រដ្ឋាភិបាលស៊ីវិលថ្មី ។
ជាមួយគ្នានេះ គណបក្សប្រឆាំងបានដាក់គំនាបឲ្យនាយករដ្ឋមន្ត្រី បង្ហាញពីគោលជំហរនយោបាយដោយបើកចំហរ មិនត្រូវមានសកម្មភាព កេងប្រវ័ញ្ចនយោបាយ យកប្រៀបទៅលើគូប្រជែងនោះឡើយ៕
