សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រុមជនសង្ស័យ២នាក់ជំនាញ ខាងឆក់ មិនរើសមុខ ត្រូវបានសមត្ថកិច្ចខណ្ឌដូនពេញ ឃាត់ខ្លួនបាន បន្ទាប់ពីជនសង្ស័យទាំងនោះធ្វើសកម្មភាពឆក់ទូរស័ព្ទ (មិនបានសំរេច) ពីស្ត្រីជនបរទេសម្នាក់ នៅម៉ោង ៩យប់ ថ្ងៃទី២៦ ខែមករា ឆ្នាំ២០១៩ នៅចំណុចមុខផ្ទះលេខ៥៣ ផ្លូវលេខ១៨៤ កែងផ្លូវលេខ៦៣ ស្ថិតក្នុងសង្កាត់ ផ្សារថ្មី៣ ខណ្ឌដូនពេញ ។
សមត្ថកិច្ចបានឲ្យដឹងថាជនសង្ស័យទាំង២នាក់ទី១-ឈ្មោះ ពៅ ដារ៉ាវិត អាយុ១៦ឆ្នាំ មុខរបរ សិស្សវិទ្យាល័យព្រះសុីសុវត្ថិ ស្នាក់នៅផ្ទះលេខគ្មាន ខណ្ឌច្បារអំពៅ ទី២-ឈ្មោះ យឹម សំណាង អាយុ១៧ឆ្នាំ មុខរបរសិស្ស ស្នាក់នៅផ្ទះលេខ១២ ផ្លូវសុធារស សង្កាត់ទន្លេរបាសាក់ ខណ្ឌចំកាមន ដកហូតបានម៉ូតូ១គ្រឿងម៉ាកហុងដា Beat ពណ៌ខៀវលាយសពាក់ស្លាកលេខភំ្នពេញ 1HG-7595 ។
សមត្ថកិច្ចបានឲ្យដឹងទៀតថា នៅម៉ោងកើតហេតុមានជនសង្ស័យចំនួន២នាក់ ជិះម៉ូតូ១គ្រឿងម៉ាកហុងដា BEAT ពណ៌ ខៀវលាយស ធ្វើសកម្មភាពឆក់ទូរស័ព្ទពីជនបរទេសម្នាក់មិនបានសំរេច ពេលធ្វើដំណើរតាមរុឺម៉កកង់បីតាមបណ្ដាយផ្លូវលេខ៦៣ ពីត្បូងទៅជើង មកដល់កន្លែងកើតហេតុ ជនសង្ស័យក៏ធ្វើសកម្មភាពឆក់ ហើយជនរងគ្រោះ ព្រមជាមួយប្រជាពលរដ្ឋបានស្រែកឆោឡោ ភ្លាមនោះកំលាំងរបស់ខណ្ឌ និង ប៉ុស្ដិ៍ កំពុងល្បាតតាមបណ្តាគោលដៅ ទទួលបានពត៌មាន ក៏ចេញអន្តរាគមន៍ដេញចាប់ឃាត់បានម្នាក់យកមកប៉ុស្តិ៍ដើម្បីសាកសួរ ដោយឡែកបក្សពួកម្នាក់ទៀតបានគេចខ្លួនបាត់ ។ ឆ្លងតាមវិធានការជំនាញសួរចម្លើយ ជនសង្ស័យគឺជាមុខសញ្ញាឆក់សកម្ម ជាប្រចាំថ្ងៃ (ឆក់អាជីព)តាមបណ្តាខណ្ឌ ក្នុងរាជធានីភ្នំពេញ នឹងបានធ្វើសកម្មភាពឆក់បានសម្រេចច្រើនដងទៅលើជនបរទេសគ្រប់ជាតិសាសន៍ ហើយបន្តឃាត់បក្ខពួកដែលបានរត់គេចខ្លួនម្នាក់ទៀតដល់ខណ្ឌចំការមន នឹងនៅម៉ោង ១១.៣០នាទីយប់ ថ្ងៃដដែល ។
បន្ទាប់ពីឃាត់ខ្លួនជនសង្ស័យទាំង២នាក់ រួមទាំងវត្ថុតាងត្រូវបានសមត្ថកិច្ចកសាងសំណុំរឿង បញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធី ៕ ជ្រោយពេជ្រ
