សារព័ត៌មាន នគរវត្ត តែងតែនាំមុខគេជានិច្ច
គេរាយការណ៍ថា បទល្មើសនេសាទប្រភេទអូសយ៉ាំងកាវចំនួន៣វង់កំពុងធ្វើសកម្មភាពនៅផ្ទៃបឹងទន្លេសាបត្រង់ចំណុចតំបន់អភិរក្ស អតីតឡូត៍លេខ២ ស្ថិតក្នុងភូមិដីរនាត ឃុំមេទឹក ស្រុកបាកាន ខេត្តពោធិ៍សាត់ ។ ការដែលគេអាចអូសយ៉ាំងកាវបាននៅតំបន់អតីតឡូត៍អភិរក្សលេខ២នោះ ក៏ព្រោះតែពួកឈ្មួញបានត្រូវរ៉ូវជាមួយនាយសង្កាត់រដ្ឋបាលជលផលបាកាន លោក លឹម សុក្រឹត រួចរាល់ហើយ ។ ក្រៅពីបទល្មើស នៃការអូសយ៉ាំងកាវទាំង៣វង់ ដែលធ្វើសកម្មភាពជាប្រចាំនោះ ក៏មានបទល្មើសផ្សេងៗទៀតបានកំពុងដំណើរការយ៉ាងគគ្រឹកគគ្រេងដែរ ។
ប្រភពបានឲ្យដឹងថា ថៅកែយ៉ាំងកាវជាជនជាតិវៀតណាមឈ្មោះ ង្វៀង យ៉ាងវើក និងង្វៀង យ៉ាងដឹក… ដោយមានការសម្របសម្រួលពីមេការជនជាតិខ្មែរឈ្មោះ រើន បាននិងកំពុងឃុបឃិតគ្នាជាមួយលោកលឹម សុក្រឹត កសាងបទល្មើសនេសាទយ៉ាងគគ្រឹកគគ្រេងនៅក្នុងអតីតឡូត៍លេខ២ ។ បុរសជនជាតិវៀតណាមទាំងពីរនាក់អះអាងថា ខ្លួនអាចនេសាទដោយសេរីនៅអតីតឡូត៍លេខ២ ក្នុងដែនសមត្ថកិច្ចរបស់លោកលឹម សុក្រឹត បានដោយស្រួលនោះ ព្រោះតែបានដោះស្រាយ (បង់លុយ) ឲ្យនាយសង្កាត់រដ្ឋបាលជលផលបាកានរួចហើយ ។ ប្រសិនបើពួកគេមិនបង់ប្រាក់ គឺគ្មាននរណាហ៊ានចូលមកនេសាទយ៉ាងសេរីដូចសព្វថ្ងៃនេះទេ ។
លោកលឹម សុក្រឹត ត្រូវបានក្រុមមន្ត្រីនៃមន្ទីរកសិកម្មខេត្តពោធិ៍សាត់អះអាងថា ជាមន្ត្រីវ័យក្មេង និងធ្វើការងាររហ័សរហួន ។ ប៉ុន្តែចាប់តាំងពីលោកត្រូវបានមកកាន់ការងារនៅខេត្តពោធិ៍សាត់ ត្រូវបានថ្នាក់ដឹកនាំផ្លាស់ប្តូរការងារច្រើនកន្លែង ព្រោះតែពាក់ព័ន្ធនឹងអំពើពុករលួយ ។ បើទោះជាយ៉ាងណាក៏ដោយ លោកលឹម សុក្រឹត មិនរអារនឹងប្រព្រឹត្តអំពើពុករលួយនោះដែរ ។ ការដែលលោក មិនញញើតនឹងប្រព្រឹត្តអំពើពុករលួយ ក៏ព្រោះតែមានថ្នាក់ដឹកនាំខេត្តជាខ្នងបង្អែក ។ យ៉ាងណាក៏ដោយ គេរំពឹងថា លោកប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តពោធិ៍សាត់ នឹងពិនិត្យមើលករណីបទល្មើសនេសាទ នៅក្នុងដែនសមត្ថកិច្ចរបស់លោកលឹម សុក្រឹតនោះផង ។
បញ្ហាបទល្មើសនេសាទ នៅក្នុងបឹងទន្លេសាបខេត្តពោធិ៍សាត់ ជាប្រធានបទក្តៅមួយ ។ ថ្នាក់ដឹកនាំខេត្តពោធិ៍សាត់ ហាក់ដូចជាមិនចាប់អារម្មណ៍ ក្នុងការបង្ក្រាបនោះឡើយ ។ កាលពីខែមុន អាជ្ញាធរខេត្តបានបើកយុទ្ធនាការគគ្រឹកគគ្រេងក្នុងការបង្ក្រាបបទល្មើសនេះ ប៉ុន្តែលទ្ធផលមិនបានដូចការរំពឹងទុកនោះទេ ។ ផ្ទុយទៅវិញ ប្រជាពលរដ្ឋខេត្តពោធិ៍សាត់និយាយថា វាប្រៀបដូចជា ជិះទូកដើរលេងបឹងទន្លេសាប នៃថ្នាក់ដឹកនាំខេត្តពោធិ៍សាត់តែប៉ុណ្ណោះ ។ យ៉ាងណាក៏ដោយគេរំពឹងថា ករណីបទល្មើសនេសាទដែលកំពុងកើតមានក្នុងដែនសមត្ថកិច្ចលោកលឹម សុក្រឹត អាជ្ញាធរខេត្ត ក៏ដូចជាមន្ទីរកសិកម្មខេត្តមិនព្រងើយកន្តើយនោះឡើយ ៕
