សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ប្រជាពលរដ្ឋបាននាំគ្នាប្តឹងសមត្ថកិច្ចឲ្យ ជួយអន្តរាគមន៍ឃាត់ខ្លួនបុរសម្នាក់យកទៅ សួរនាំបន្ទាប់ពីសង្ស័យថា លួចគាស់ផ្ទះប្រជាពលរដ្ឋលួចទ្រព្យសម្បត្តិ ។
ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង៧យប់ ថ្ងៃទី២៧ ខែមករា ឆ្នាំ២០១៩ នៅផ្ទះជួលភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ ។
ជនសង្ស័យឈ្មោះ ឆាំ រតនៈ ភេទប្រុស អាយុ២៥ឆ្នាំ មុខរបរនៅផ្ទះ ស្នាក់នៅផ្ទះជួលភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ ។ ចំណែកជនរងគ្រោះឈ្មោះ សុខ ភី ភេទស្រី អាយុ៣៥ឆ្នាំ មុខរបរកម្មកររោងចក្រ ស្នាក់នៅភូមិកើតហេតុខាងលើ មានស្រុកកំណើតនៅភូមិស្រុកប្រាសាទសំបូរ ខេត្តកំពង់ធំ។
តាមប្រភពព័ត៌មានពីស្ត្រីរងគ្រោះបានឲ្យដឹងថា នៅមុនពេលកើតហេតុ នៅថ្ងៃទី២៦ ខែមករា ឆ្នាំ២០១៩មានជនសង្ស័យបានធ្វើសកម្មភាពគាស់បន្ទប់របស់គាត់ដោយលួចយករបស់របរដូចជា ឆ្នាំងបាយអគ្គិសនី តុក្កតា ព្រមទាំងប៊ីចេង ស្ករ ត្រូវបានជនសង្ស័យ លួចយកអស់គ្មានសល់ ។
ក្រោយមកអ្នកជិតខាងឃើញតុក្កតាដែលស្ត្រីជនរងគ្រោះបាត់នៅក្នុងបន្ទប់ជួលរបស់ជនសង្ស័យ ពេលនោះដែរសុំឆែករកមើលក្នុងបន្ទប់ជួលរបស់ជនសង្ស័យខាងលើ តែជនសង្ស័យព្រមទាំងប្រពន្ធថាតុក្កតាខាងលើនោះគឺគាត់បានទិញពីក្មេងរើសអេតចាយនៅតាមផ្លូវ ហើយជនសង្ស័យនិយាយថា ខ្លួនមិនបានលួចរបស់របរជនរងគ្រោះនោះឡើយ ហើយនៅពេលជនរងគ្រោះ និងអ្នកជិតខាងផ្ទះជួលខាងលើ បានឃើញតុក្កតាខាងលើពិតប្រាកដមែន ក៏ទាក់ទងទៅម្ចាស់ផ្ទះជួល ដើម្បីប្តឹងសមត្ថកិច្ចឲ្យជួយអន្តរាគមន៍ភ្លាមៗផងដែរ។
ប្រជាពលរដ្ឋបានបញ្ជាក់ទៀតថា តាំងពីជនសង្ស័យមករស់នៅផ្ទះជួលខាងលើ ប្រមាណជិត២ខែកន្លងមកនេះ បន្ទប់ជួលរបស់អ្នករស់នៅក្បែរតែងតែបាត់របស់របរជាច្រើនលើកផងដែរ ហើយគេសង្ស័យជាច្រើនដងមកហើយ តែមិនទាន់ឃើញភស្តុតាង ។
បន្ទាប់មកជនរងគ្រោះខាងលើមិនបានប្តឹងជនសង្ស័យនោះឡើយ គ្រាន់តែឲ្យម្ចាស់ផ្ទះជួលបណ្តេញចេញទាំងយប់ ហើយសមត្ថកិច្ចឱ្យជនសង្ស័យធ្វើកិច្ចសន្យា និងធ្វើសាវតាជាតិទុក និងឲ្យប្រពន្ធមកធានាដើម្បីត្រឡប់ទៅផ្ទះវិញភ្លាមៗផងដែរ ៕ សុខាសែនជ័យ
